Muslim quota atema Telangana assembly nung bill agizük

Hyderabad, April 16 (Agencies): Deobarnü Telangana state Assembly nung backward Muslims atema menden shilem 12 aser Scheduled Tribes (ST) atema menden shilem 10 wazüka yutsütsü asoshi bill ka agizükogo. Tanü atema BJP züngsem pongu assembly nungi anenja liasü.
Bharatiya Janata Party (BJP) züngsemtemi bill anaprong anema senden nung longkak aita liasü, ajisüaka tanüngba opposition party temibo Backward Class, Scheduled Castes aser Scheduled Tribes Reservation Bill, 2017 ji agizük. Iba bill nung maneni o lemteptsü aser state legislative council nung agizüktsü.
Tanep assembly senden tenzükba sülen Chief Minister K Chandrasekhar Rao-i Muslim nunger rongnung Backward Classes (E) category kübok aliba nüburtem nem tang menden shilem 4 agüja aliba nungi shilem 12 tashi kümtsütsü atema bill benoka liasü. Ano Scheduled Tribes nisungtem atema shisaliok rejutem aser sorkar mapatem nunga shilem 6 agüja aliba nungi shilem 10 kümtsüogo.
State legislative council-i iba bill agizükba sülen maneni iba bill ya Constitution 9th Schedule nung züngsemtsü atema Tir dang mepishitsü.
Iba bill nung o toktepdang Chief Minister Chandrasekhar Rao-i, Telangana-i mepishibaji Centre-i magizükra state-i Supreme Court matsüngdang benoktsü, ta metetdaktsü.
Rao-i, “Joko küm 20 dak tema Tamil Nadu nungbo reservation shilem 69 dak tema benoka inyaker. State pongu-trok shii reservation shilem 50 dak tema agutsür. Süra kechibaji Telangana nembo magütsütsü?” ta ashi.
Supreme Court-i Centre aser state tem naprong nem reservations shilem 50 tashibo agutsütsü atema latetja lir.
Chief Minister-isa, reservations ya tamangba yimsü mesüra kinkidong nung ajemdaker masü saka lokti aser rongsenkettsüng jenjang nung ajemdaker agütsür, ta ashi.
Iba ya state atema putiotsü anogo ka lir, ta shia Rao-i, election mapang nung Telangana Rashtra Samithi (TRS)-i Backward Classes (E) aser Scheduled Tribes nem menden wazüka yuja aliba shilem timba kümtsütsü ta nangzüka liasü aser ibaji tang ataloktsüogo, ta ashi.