Muslim tsür 3-i US Human Rights Prize agizük

(Abelen nungi achijileni tarensena) Uighur tsür, Rebiya Kadeer; Uganda tsür, Irshad Manji aser Somalia tsür, Ayaan Hirsi Ali nungeri 2015 US Human Rights Prize agütsüba sentong nung Washington kübok Capitol Hill nung shilem agiba noksa nung angur. (Washington, December 11)

Washington, December 11 (Agencies): Alima tesem balala nungi aruba Muslim tsür 3-i 2015 US Human Rights Prize Washington D.C. nung yashi Brehostibar nü agizükogo.

Nübur temeten atema pei taküm bendanga agüja nokdaker, Somalia tsür, Ayaan Hirsi Ali; Uganda tsür, Irshad Manji aser Uighur tsür, Rebiya Kadeer nungeri Lantos Human Rights Prize-ji yashi International Human Rights Day nung agizüka liasü.

Tesüiba mapang Germany nunger Nazi mitkartemi Yihuda nunger reshikangshibaren, Holocaust lendong nung taküm kümzüka US Congress yimsüsür akümsang, Lantos nüngtem nung Tom Lantos Human Rights Commission (TLHRC)-i Lantos Human Rights Prize ya Washington kübok Capitol Hill nung temsüba nisungtem nem kümshi agütsür.

2009 küm nungi tenzüka agütsüba Lantos Human Rights Prize ya Tibet nunger tanülar lenisang, Dalai Lama aser China nunger nübur temeten asoshi nokdaker, Chen Guangcheng natia taoba mapang agizüka lir.

Ajisüaka, Islam tamangba yimsü benshir tetsür 3-i tan mezüngsüa iba nungtugu sempet ya taküm agizüker lir.

Somalia nung 1969 küm asola, Ayaan ya lar kinünger ka den tashiyim agi kibong kümdaktsü saka lai tesülen The Netherlands-i jena oa idakji jenok.

Netherlands nung office kioker aser Netherlands Parliament yimsüsür ka atema oshi meyiptsür inyakla, Ayaan-i la taküm bendanga agüja tetsür temeten atema nokdaker ka kümogo.

“Ni tanübo Islam tamangba yimsü mebenshir. Ajisüaka, aikati nisung tepsettsü, tetsür tashiyim agi raksatsütsü aser iba amala tesembatsü maparen inyaktsü atema Islam tesayuba mashilen amshir,” ta Ayaan-i metetdaktsü.

Uganda nung asola, arishi küm 46 tain Irshad Manji-a la arishi küm 4 kinü asüdang lar tsürabur Canada-i oa idakji ali.

La arishi küm 14 tanür alidang lai tasüngdangba tali asüngdangba yong la Islamic school nungi aridok aser iba yongji lai lasasa Islam tesayuba angatettsü merang.

Lai nübur nem temeten tali agütsütsü nükjidong nung Islam tamangba yimsü tajungba küma melenshitsü merang aser iba yongji Islam tamangba yimsü dak atemer ozüng alema inyakertemi la aiben tepsettsü merangogo.

China northwest tsütsü alir Muslim kin, Uighur nung züngsemla, arishi küm 69 tain Rebiya ya sensak kibong ka nung aso saka la tanübo millionaire shishilembar ka kümogo.

Lai lar Uighur kin temeten atema China anema nokdakba yong China sorkari Kadeer tepuokdak küm 6 tashi puoka ayu.

Kadeer tanübo US nung jenoka lir saka lai maneni lar Uighur kin temeten atema nokdakba osang bushiteta lir.