MUZicause tenzüksang-i Nagaland semdang

Dimapur, Aenjeti/Jan. 31 (TYO): MUZicause (Artists United for a cause, Bangalore, Karnatak) tenzüksang, Unesh Gopinath Jadhav-i India linük akhumtsübua JANMBHOOMI-KARMABHOOMI tangatetba nung “INDIAN FIRST” omen nung ajemdaker mission ka tenzükogo. 2019 küm February 14 nü Pulwama lendong nung CRPF asürtem kinunger ajak semdangtsü nükjidong nung pai iba mission ya Group Centre, CRPF, Bangalore nungi Valour Day (April 9, 2019) nung tenzüka liasü aser February 14, 2020 nü Pulwama nung akhum agütsütsü atema sepai asür kidang nungi ‘temeshi ali’ bener aotsü.
Kohima-i aoba mapang Unesh Gopinath Jadhav-i January 30, 2020 aonung 8:00 nung 78 Bn, CRPF, Zubza atong. 78 Bn nung Commandant, Surender Singh-i anir sepat tanishir aser sepaitemi pa pelashishia agizük aser yangji Brehostibar aonung anenzük.
January 31, 2020 anepdang 7:00 nung pa Kohima-i apuso, kong pai World War II mapang asüba sepaitem asoshi yanglua aliba Kohima War Cemetery nungi ali benden.
Paisa Nerhema, Kohima nung 2nd Rajputana Rifles nungi Kargil rara nung asür Captain Neikezhokuo Kenguruse, MVC indang kinungertem ajuru aser ali bener ao. Nagaland nung pa mapa tembangba sülen Imphal, Manipur-i apusoa ao, ta osang ka ajanga ashi.