Myanmar Army Chief o bendangtsüla: UN Rights Envoy

Bangkok/Dhaka, Aenjeti/January 26 (Agencies): Rohingya Muslim nunger samatsütsü merangba atema Myanmar army chief obendangtsüla, ta U.N. human rights investigator kati ashiba den refugee tem linüki meyipa mao tsüngda aibelena alirtem o bendangtsü ya kanga tongtibang, ta shisem.
Myanmar nung United Nations’ Special Rapporteur on Human Rights Yanghee Lee-i, Thailand aser Bangladesh semdangba mapang iba olen ya ashi, kong la Rakhine state nungi mindokba Rohingya nunger aser ketdangsertem den ajurutepa liasü.
“Rakhine nunger samatsütsü merangba aser humanity anema aibelenba den Myanmar nung tanga tesem nung rara nung aibelenba tem anema Min Aung Hlaing aser pa kübok alirtem o bendangtsüla,” ta Lee-i military commander-in-chief tetshia ashi, shiba iba linüki marudaktsür.
Tang mezüngbuba lai army tekolakba o bendangtsü asoshi yimja nung jembiogo. Taoba küm ochi kechi aji jangjatsü asoshi bushisüngdangba telok ka ajanga ashiba agi, military campaign kong kin ka ajunga samatsütsü nükjidong nung nisung aika tepsetba aser tashiyim agi tetsürtem raksatsüba refugee temi kuli agütsüogo, iba dak sendakba nung Min Aung Hlaing den general parnok pongu international law kübok temaba jenjang nung aibelenba atema o bendangtsü benoka liasü.
2017 August nungi tenzüka Rohingya nunger parnok 730,000 Rakhine toktsür Bangladesh-i jenaogo, kong parnok camp tem nung mejeptepa lidar.
“Parnok meyipa yoktsü atema ozüng alema inyakertem tamasa aitsütsüla, kechyiong kecha tasadangba ka makai refugee tem meyipa yokba ajanga tensa tamajungba kümshitsü mesera Myanmar nung tensa mapa talangba mejungi alitsü,” ta January ita Thailand nung interview ka nung Lee-i ashi.
Iba dak sendakba nung Myanmar military otongdar aser sorkar den tongtepratep mesütet. Myanmar-i taoba mapang nung refugee temi parnok anema ken o benokba ajak aitsüogo aser ashiba agi, parnoki kiralongraba maparen anema tim jenjang agi.
September ita U.N. Security Council-i, Myanmar atema independent mechanism ka amenoktsü vote agütsütep. Iba lokti tentet ajanga linük nung ozüng alema inyakba maparentem bushisüngdangtsü koba okadak kuli amai amshitettsü.
Lee-i ashiba agi, independent mechanism ajanga “victim support” atema sen agütsütsü aser iba nung criminal case tem atema sen agütsütsü densema lir.
Myanmar-i ashiba agi, parnok inyaksangshiba dak sendakba nung International Criminal Court (ICC)-i teka amoka inyaksangshitsü kecha temeden mali.
U.N. Security Council-i non-party tem ICC dangi bentettsü saka ketdangsertemi ashiba agi, permanent members China aser Russia nati iba amala jenjang agiba ya magizüktsü akok.
Lee-i iba tesem semdangba mapang southern Bangladesh nung Rohingya refugee tem aliba tesem Cox’s Bazar semdanga liasü, kong parnok atema Bangladesh sorkari khen asoshi ki tasen sütsüdar.
Bangladesh sorkari ashiba agi, refugee tem Bhasan Char asetkong-i anir aoba ajanga tang aliba camp tem mesümei aliba tebilemtsü bentettsü. Ajisüaka humanitarian teloktemi iba jenjang agiba aija ashiba agi, iba asetkong nung yipru mopung aiben adoker aser nisung meyirejang aika suyima chiyongtsü tamakoktsü asütsü.
Dhaka nung Hokolbarnü osangbenertem den sensaksemba mapang Lee-i Bangladesh sorkar dang Bhasan Char-i refugee tem anir mao tsüngda U.N. aser humanitarian agency tem den ashishiteptsü shiogo. Laisa iba jenjang ya kangabo aitepa magitsüla ta shia liasü.