Myanmar arrtsülen NSCN (K) o Assam Rifles na kateper

Dimapur, Sept. 12 (TYO) : India sepaitemi Nagaland aser Myanmar na arrtsülen NSCN-K purtem jenoka alidak amaktsü asoshi yimtsüng ana nung mita aoba mapang NSCN-K o Assam Rifles na tsüngda kanga sashia khatepogo ta angazüker.
Iba khatepba lendong ya yakonung Brehostibar aonung atalok. Iba aonung Assam Rifles pur parnok noklangka shi oagi Myanmar tsütsülen aliba yim ana tenüng agi Shera aser Shashen nung NSCN-K pur parnok ter shi jenoka lir ta osang lazükba sülen mita aoba mapang iba lendong ya ataloka liasü. Ajisüaka, tang tashi nung iba lendong nung asüba aser yiruba osang kecha mangazüker.
Iba khatepba lendong ya National Investigating Agency (NIA) ajanga NSCN (K) tongti lenir S.S. Khaplang aser kasa telok nung arkotong (military chief) Niki Sumi na aputsüsa osang agütsür nem sen senpet lakh 17 agütsütsü ta sangdongba sülen atalok.
Iba aonung NSCN-K o Assam Rifles na tsüngda ghonda anashi khatep. Iba sülen ano Assam Rifles pur meyirijang ka shi Myanmar anasa yimtsüng ka tenüng agi Koki yim tonga lir. Koki yim ya Nagaland kübok aliba Old Thewati yim anasa lir.
Tamalena iba ama amakba mapang Assam Rifles purtemi Pangsha nung August 28 nü amakdang tai maketba nisung 9 tashi khaset. Iba anogo ya Naga Mothers’ Association purtemi oagi Pangsha anasa NSCN-K lenirtem den parnok alidak, ano India den yimjung nung alitsü asoshi mepishia jembitsüba sentong liasü.