Myanmar arrtsülen nungi Assam Rifles magientsü: Rajnath Singh

New Delhi, March 22 (Agencies): Tanü Union Home Minister, Rajnath Singh-i, India-Myanmar arrtsülen nungi Assam Rifles magientsü aser tanga paramilitary force agi memelentsü; iba ama telemtetbaji tang tashi nungbo agia mali, ta metetdaktsü.
Tanü Shillong nung 181buba Assam Rifles Raising Day sentong nung adenba sülen osangbenertem den jembidang Singh-i, “Tang tashi onoki telemtetbaji agia mali. Kodang item ama telemtetbaji agitsüsa kümdir, onoki nenok nem metetdaktsütsü,” ta ashi.
Iba arrtsü ya tanga border anüker sepai, Indo-Tibetan Border Police (ITBP) nem Centre-i lemzüktsütsü ta osang kar proka liasü.
Tamalen iba mapa ya Border Security Force nem lemzüktsütsü atema bilemdanga liasü aser iba dak sentakba nung assessment report agia liasü.
India aser Myanmar na tsüngda atsü matsüba arrtsü kilometer 1,643 km lir, aser item rongnung- Arunachal Pradesh nung kilometer 520, Nagaland (215 km), Manipur (398 km) aser Mizoram (510 km) iba den külemi tenokdangba kecha melii sademsadema senzüba kilometer 16 tashi lir.
1835 küm tenzükba Assam Rifles ya Union Home Ministry tetuyuba kübok inyaker.
Home Minister-i yashi nungi tenzüka anogo ananü atema Meghalaya semdanger.