Myanmar aser India-i tim mesüi inyaker: NH

Dimapur, May 20 (TYO): Myanmar kübok Naga tesemtem nung mitkartemi ozüng alema mapa inyakba atema aoksar ta Naga Hoho-i sangdong ka nung metetdaktsü.
Myanmar aser India linüktem nung Naga nunger yimten latettsü asoshi mapa teinyakdak lir saka Myanmar aser India sorkartemi aiben tim masüba maparen inyaka arur.
Myanmar sorkari Naga self Administered Zone nung Naga nungertem timtemdaktsür aser mitkari tuyuba ama Myanmar sorkari tenokdangba agütsür aser tanga nüngdakba chiyungtsü aser osettem magütsür, ta Naga Hoho-i ashi.
2016 küm tensa mejungi akümba ajanga tilatanur aika measles ajanga asü. March 2019 nung Naga lennir 10 Naga aser Myanmar sorkar tsüngda yimjung olemtep atema mapa inyaki aoba metetsümonga mitkartemi parnok apu. Tang tashi parnok tepuokdak yua lir, ta Naga Hoho-isa shisem.
Myanmar sorkari Naga nunger dak yamai mapa tamajung inyakba aitsür. Naga Hoho ya Naga nunger ajak asoshi tematiba lokti lir aser India o Myanmar dang Naga nunger anema inyakba mapa anentsü ayongzüker, ta parnokisa metetdaktsü.
Prangpong-injang amer raraba mapa ya United Nations aser Democratic front of Myanmar-i aitsütsü atema Naga Hoho-i ayongzüker, ta parnokisa shisem.