Myanmar by-election April ita agitsü: UEC

Naypyidaw, October 19 (Agencies): Myanmar linüki par parliamentary by-election sentong taruba 2017 küm April ita agitsü renemba osang ka Myanmar’er Union Election Commission (UEC)-i tanü, Bodbar nü sangoktsüogo.
House of Representatives (Lower House) menden 9, House of Nationalities (Upper House) menden 3 aser state parliament menden 6 densema, Parliament menden 18 tashi abensadaktsütsü nükjidong nung by-election sentongji agitsü renema lir.
Bendanglen alir Myanmar sensotemi election agiba jakdang par vote mapang jilia agütsütsü atema taküm 2016 küm November ita 15 nungi December ita 15 nü tashi mapang latettsüba aser kasa election nung candidate ama tokteptsü atema tenüng benoktsü atema November ita 28 nü nungi December ita 07 nü tashi UEC-i latettsüogo.
Iba election den sentakba nüboyimtsü maparen sangküm January ita 30 nü nungi March ita 30 nü tashi agidaktsüba sülen election-ji April 1 nü agitsü aser election nung takok angur osang election agir anogo 4 tsüngda nung nüburtem dang sangoktsütsü renema lir.
Yaküm, 2014 küm November ita agiba general election nung constituency kar nung vote agütsütsü maparen takok ngua meinyaktetba ajanga parliament menden kar azüngteta aliba aser parliament yimsüsür kar cabinet minister menden bendaktsüba ajanga tanüngba parliament mendentemji azüngtettsüsa akümba osang jangjaogo.