Myanmar cabinet nung yimtenren telok balala densemtsü: Suu Kyi

Yangon, November 26 (Agencies): Myanmar cabinet tasenba nung National League for Democracy (NLD) yimtenren telok den külemi, yimtenren telok aser kin kidong balala nungi yimsüsürtem anioktsü sentong renemba osang ka NLD telok lenila, Aung San Suu Kyi-i tanü Brehostibar nü metetdaktsüogo.

Tawa agiba Myanmar parliamentary election nung NLD teloki tanüngba yimtenren teloktem den temaba jenjang ngua par telok kija sorkar tasenba tentettsüsa jenjang tajung angu.

Ajisüaka, tan mezüngsüa democracy yimsüsütsü yimya benshia tentetba Myanmar sorkar tasenba nung sentaktepshi lidaktsütsü nükjidong nung sorkar tasenbaji teloktep sorkar südaktsütsü lemtetba osang Suu Kyi-i jangjashitsüogo.

“Ozü NLD teloki parliament menden timba ajangzükogo saka ozü telok kijai menden ajunga agitsü tebilembo mali,” ta lai ashi.

“Myanmar ajunga nung sentaktepshia telungjem lidaktsütsü nükjidong nung ozü NLD teloki anir teloktep sorkar tentettsü renemogo,” ta lai nenshia ashi.

NLD teloki sorkar tasenba tentettsüsa takok anguba ajanga par teloki aginüba Tir shimtsü tashia ngua lir.

Parlaiment züngsemtemi Tir tasenba shimtsü aser Tir-i cabinet yimsüsürtem shimtsü asoshi par linük temzüng nung lateta lir.

Ano külen, linük temzüngisa bendanger den kibong akümer mesüra pei tanuri bendang senso agia alir ka nem linük Tir menden abentsü temeten agüja maliba yong Britain nunger den kibong akümba den külemi, jabaso anapronglai Britain senso agia alila, Suu Kyi-i Tir menden mebentettsüsa tang jenjang ajurua lir.

Tasenba Myanmar parliament senden taruba 2016 küm February ita mena par Tir tasenba shimba sülen sangküm April ita nü nungi tenzüka Myanmar sorkar tasenbai taruba küm 5 asoshi linük ymsüsütsü tashi benoktsü renema lir.