Myanmar election sentong memelenshir:UEC

Nay Pyi Taw, October 14 (Agencies): Myanmar’er 2015 general election sentong renemba ama, memelenshi taruba November ita 8 nüsa agitsü renemba osang ka Union Election Commission (UEC)-i tanü Bodbar nü osang jangjashitsüogo.

Election agitsü mapang thinentsü onük benoka Central Coordination Committee (CCC) den senden ka amenba sülen UEC-i par election sentong memelenshitsü telemtetbaji agiba osang jangjaogo.

Par linüki tzümetsüng lendong ajuruba dak ajemdaker par election sentong thinentsü onük ka UEC-i yashi Mongolbar nü benoka liasü.

Ajisüaka, election sentong thinentsü onükji Myanmar opposition lenila, Aung San Suu Kyi aser lai aniba National League for Democracy (NLD) teloki magizükba osanga jangjaogo.

Ano külen, taoba September ita 8 nü nungi tenzüka NLD densema Myanmar nung tentetba yimtenren teloktemi taruba November ita 8 nü agitsü ayongba election nung takok angutsü nükla tulu nung par election nüboyimtsü sentong inyaktepba osang bushiteta lir.