Myanmar election sentong memelenshitsü: U. Tin Aye

Yangon, August 07 (Agencies): Myanmar linüki tang tzümetsüng lendong tesashi ajurua liaka, par linüki renemba election agitsü sentong memelenshitsü lemtetba osang ka Myanmar sorkari tanü Hokolbar nü metetdaktsüogo.

“Myanmar-i tang tzümetsüng lendong tulu ajurua lir saka iba jagi taküm November ita agitsü ayongba general election sentong memelemshidaktsütsü renemogo,” ta Myanmar’er Union Election Commission (UEC) mendenbuba, U. Tin Aye-i sangoktsü.

Tanü tashi nung kijapur 67 densema Myanmar nung tentetba yimtenren telok 56 nungi candidate 2,073-i par general election nung candidate ama toktepa shilem agitsü asoshi tenüng züluokba osang jangjaogo.

“Tan Myanmar indang yimsüsütsü tashi abenba Union Solidarity & Development Party (USDP) telok nungi candidate 910-i aser opposition lenila, Aung San Suu Kyi-i aniba National League for Democracy (NLD) telok nungi candidate 1,133-i tenüng züluoka lir,” ta Aye-i metetdaktsü.

Ano, election nun candidate ama shilem agitsü asoshi tenüng züluoktsü tatembangbuba anogo tan August 8 nungi August 16 küma atsünglangshitsüba osang ka pai lemsatepa liasü.

Myanmar-i taküm November ita election agiba sülen taruba 2016 küm tetenzüklen sorkar tasenba tentetsü alizüng yua lir.

Ano külen, Myanmar nung tzümetsüng lendong atalokba ajanga tanü tashi nung nisung 88 shi asüba osang jangjaogo ta social welfare ministry ketdangser, Phyu Lei Lei Tun-i tanü metetdaktsü.

“Tzünglu kanga sashia aruba ajanga bener arutsüba tzümetsüng aser anentsü lendong atalokba ajanga tanü tashi nung nisung 330,000 dak temai timtem toushi jenti ajurua aliba osanga bushiteta lir,” ta pai ashi.

Yashi, Brehostibar nü tashi nung nisung 74 tashi asüba osang bushiteta liasü saka tanübo kasaji timba küma nisung 88 tashi asüba osang jangjaogo ta pai shisem.