Myanmar election sentong thinentsü akok: UEC

Union Election Commission (UEC)-i Naypyidaw yimti nung ayongba election sentong thinentsü senden nung shilem agiba sülen Myanmar opposition lenila, Aung San Suu Kyi-i osangbener den ajurutepba noksa nung angur. (Naypyidaw, October 13)

Naypyidaw, October 13 (Agencies): Myanmar-i taruba November ita 8 nü agitsü ayongba election sentong magitettsüsa küma kasaji thinentsüsa akümba osang ka Union Election Commission (UEC)-i tanü Mongolbar nü metetdaktsüogo.

Par linüki lendong tsüngdong ajuruba yong par election agitsü mapangji thinentsü asoshi UEC-i par linük tentetba yimtren telok ajunga ajungshiba osanga angazükogo.

Ajisüaka, election agitsü mapang thinentsü onükji magizükba olen ka Myanmar opposition lenila, Aung San Suu Kyi aser lai aniba National League for Democracy (NLD) yimtenren teloki UEC-i Naypyidaw yimtiba nung ayongba rongdak senden nung benoka liasü.

“Ozü linüki Cyclone Nargis yipru lendong 2008 küm ajuruba sülen nisung 100,000 dak tema asü saka iba lendongji ataloker anogoshi ka süir külen linük temzüng yanglushitsü vote agütsütsü sentong agia liasü. Aji oda tan atalokba lendongji Nargis lendong ama tulua masüba yong tan benokba election mapang thinentsü onükji magizüker ta ozü NLD teloki UEC-i ayongba senden nung metetdaktsüogo,” ta NLD central executive committee nung züngsem, Win Htein-i metetdaktsü.

Tawa Chin State kübok Harkar aser Sagaing Region kübok Kawlin an nung tzümetsüng lendong ajurua nisung 100 dak tema asüba lendong dak atemer par election sentong thinentsü onükji UEC-i benokba osang jangjaogo.

Taoba ita ishika tejaklen nungi tenzüka Myanmar nung tzümetsüng lendong ataloktsü tenzükba sülen tanü tashi nung nisung million 1.6 shi timtem toushi jenti ajuruba osang bushiteta lir ta United Nations (UN) kübok tentetba Coordination of Humanitarian Affairs Office-ia metetdakja lir.

Aji oda, Suu Kyi-i aniba NLD teloki magizük aka, Union Solidarity Party, Farmers’ Development Party aser National Development Party nunger densemba yimtenren teloktemibo EUC-i benokba onükji agizüktsü mulunga aliba osang jangjaogo.

Ano külen, sorkar anemer telok balalai timtem kanga sashia agütsüba yong Kachin aser Shan State na kübok tentetba yimtsüng noklang ka dak tema nungbo sentong renemba ama, taruba November ita 8 nü election magitettsüsa akümba osang ka EUC-i taoba mapang metetdakja lir.

Ajisüaka, par linüki tzümetsüng lendong ajuruba yong masü saka yimtenren tajangzük angutsü nükjidong nung tan election sentong thinentsü onükji benoker asütsü akok ta Myanmar’er election sentong tendanger mongintemia metetdaktsüogo.

Ano, NLD teloki magizük aka, par linük indang election sentong thinentsü mesüra sentong renemba ama, taruba November ita 8 nü agitsü osang tejangjaji EUC-i anogo ishika lir külen alima dang sangoktsütsü renema lir.

Taruba ita agitsü ayongba election sentong nung candidate ka ama shilem agitsü asoshi lenir 6000 dak tema pei tenüng benok saka tsürapuri bendang senso agia alirtem nem par election sentong nung candidate ama shilem agitsü asoshi linük temzüngi memelaba yong parnok 75 tashi candidate tenüng tarensen nungi tenüng agienba osang bushitetogo.