Myanmar Foreign Minister, Suu Kyi-i Laos semdang

Myanmar Tir, Htin Kyaw den aroki Laos linük bushia aoba jakdang Myanmar Foreign Minister, Aung San Suu Kyi (Abelen) aser Myanmar mitkar Commmander-in-Chief, General Min Aung Hlaing (Achiji) nati Naypyitaw nung tentetba tayimtsü anendak tonga aoba noksa nung angur. (Naypyitaw, May 06)

Yangon, May 05 (Agencies): Myanmar Foreign Minister, Aung San Suu Kyi-i kidangsüa aliba Laos linük tanü, Hokolbar nü semdangogo.
Suu Kyi aser lai aniba National League for Democracy (NLD) yimtenren teloki Myanmar linük indang yimsüsütsü tashi taoba March ita benokba sülen Suu Kyi-i tan mezüngsüa bendang linük ka semdanger lir.
Laos Tir, Bounnhang Vorachit-i par linük semdangtsü jaokba onük agizüka, Suu Kyi aser Myanmar Tir tasenba, Htin Kyaw nati tan Laos linük semdangba osang ka Myanmar aser Laos sorkar ketdangsertemi osang jangjashitsü.
“Suu Kyi aser Kyaw nati Laos tonga aoba sülen Laos lenirtem den senden mena par linük ana tsüngda amalitep aser tesendaktep tajung alitsü onük benoka jembi,” ta Laos sorkari ketdang asüba KPL News Agency-i metetdaktsü.
Tanü lenirtemi par region aser alima jenjang nung par linük ana ajangzüktsü onük benokba den külemi, par linük ana nung tentetba tongti tesemtem tonga tayimtsütem tanaben senzüdaktsütsü onüka benoka jembiba osang jangjaogo.
Yaküm 2015 küm November ita agiba election nung NLD teloki takok tulu ngua, par Myanmar indang yimsüsütsü tashi benoktsüsa jenjang tajung angu.
Ajisüaka, Myanmar linük temzüngi bendanger ka den kibong akümer mesüra pei chirnurtemi bendang senso agia alir lenirtem nem Myanmar Tir menden abentsü temeten magütsütsüba yong Suu Kyi-i election nung takok nguaka, lai Tir menden abentsü temetenbo mongutettsüsa jenjang ajuru.
Aji oda, lai Tir mendenji asangsang nung abentsü maongka monguaka, lai tenüng magi tang Myanmar madak yimsü asütsü tenzüka lir.