Myanmar Foreign Minister, Suu Kyi-i Thailand semdanger

Myanmar Foreign Minister & State Counselor, Aung San Suu Kyi (Abelen, 2 buba)-i Thailand yimtiba, Bangkok kübok Suvarnabhumi airport tonga aodang agiba noksa ka yangi angur. (Bangkok, June 23)

 Bangkok, June 23 (Agencies): Thailand nung mapa inyaka alir Myanmar nunger migrant nisung noklang aikati Nobel peace sempet agizükla, Aung San Suu Kyi kanga pelashishia tanü, Brehostibar nü agizükogo.

Lai aniba National League for Democracy (NLD) yimtenren teloki yaküm, 2015 küm November ita agiba election nung takok ngua, Suu-i Myanmar foreign minister den state counselor menden benokba sülen lai tan mezüngsüa kidangsüa aliba Thailand linük semdanger lir.

Thailand nüburtemi meinyaknüba mapa tasak inyaka alir Myanmar nunger migrant nisung million 3 shi tang Thailand nung telidak aliba osang bushiteta lir.

Aji oda, Thailand nung alir Myanmar nunger migrant nisungtem indang taküm jenjang tajungba kümdaktsütsü nükjidong nung Suu Kyi-i tan Thailand semdangba osang angazükogo.

Suu Kyi-i tan Thailand semdangdang, Myanmar nunger migrant nisungtem nem ozüngi melaba ama Thailand nung mapa inyaktsü temeten agütsütsü tezüngzüktep ka Thailand Tir, Prayuth Chan-ocha den asüng, Hokolbar nü agitsü sentong lir.

Suu Kyi-i tan anogo 3 agia Thailand semdangba ya lai aniba NLD teloki Myanmar indang yimsüsütsü tashi taküm March ita 30 nü benokba sülen lai tan agi bendang linük tanabuba semdanger lir.

Ajisüaka, Thailand’er mitkar junta-ibo tan Suu Kyi-i par Thailand linük semdangbaren magizükteti aliba osang angazükogo.

Nübur temeten asoshi nokdakertemi ayonger külen Thailand nung mapa inyaka alir Muslim Rohingya nübur million 1.1 shi ajurushiba timtem toushi indang osang osangbener den lemsatepba sentong ka Bangkok nung tanü agi saka mitkartemi iba sentongji sentong tom nung tashiyim agi anentsüba osang jangjaogo.

Ano külen, nütsüng yongsük ajema alir Rohingya nisungtemi ajurushiba timtem toushi agientsütsü atema Suu Kyi-i nungdakba maparen meinyakba atema bendanglen alirtemi Suu Kyi-a aija lir.