Myanmar-i election tetendanger yoktsü lemtetogo: EU

Brussels, September 29 (Agencies): Taküm November ita 8 nü agitsü ayongba Myanmar election agibaren tendangdaktsütsü atema par tetendangertem Myanmar-i yoktsü lemtetba osang ka European Union (EU)-i tanü Mongolbar nü metetdaktsüogo.

Myanmar opposition lenila, Aung San Suu Kyi-i aniba National League for Democracy (NLD) yimtenren teloki takok tulu angutsü imlaba election tendangtsü asoshi EU-i tan mezüngsüa par tetendangertem Myanmar-i yoktsü renemer lir.

“Myanmar nung democracy yimsüsütsü yimya den sentakba temelenshi tajung agitsüren maneni nungiter ta sayutsü nükjidong nung ozü EU-i ozü tetendangertem Myanmar-i yoka par election agibaren tendangdaktsütsü lemtetogo,” ta EU foreign affairs lenila, Federica Mogherini-i tanü osang jangjashitsü.

“Ajaki shilem agitetba aser tensa tajung nung election agiba ajanga Myanmar-i nungdakba temelenshi takok ngua agitettsü,” ta lai ashi.

Suu Kyi-i aniba NLD teloki taoba mapang, 1990 nung agiba election nung takok tulu angu saka mitkartemi par takokbaji magizükba den külemi, Suu Kyi mapang shia lar ki kilung pua ayuba osang bushiteta lir.

Lai 2012 küm agiba parliament election nunga takok ngua parliament züngsem ka aküm saka lar linük nung ocet kar latetja aliba yong lai Myanmar Tir election nungbo candidate ka ama shilem agitsü temeten monguteti lir.