Myanmar-i India den arrtsü anasa sepai talila lemzüktsür

New Delhi, July 26 (Agencies) : Myanmar-i India den arrtsü anasa sepai talila mapa lemzüktsüogo aser iba ya India-i par lushi nung telungpurtem amakba mapa noktangtsü mechi nung lir ta ajiteter.
Arrtsü anüktsü asoshi additional brigade ka lemzüktsüba nung sepai 6,000 shi densema lir. Kilometer 1,643 tasazük Indo-Myanmar arrtsü anüktsü atema Myanmar-i sepai brigade pungu lemzükja liasü aser ano tang ka lemzüktsüogo, ta Deobarnü sorkar ketdangser kati ashi.
Taküm June 9 nü Indian Army commando temi northeast telungpur teloktem indang tesep amakba mesükba mapa meinyakdaktsütsü nükjidong nung sepai talila lemzüktsür asütsü ama ajiteter, ta ketdangserisa shisem.
Indian army nungi commando 70 shi ka assault rifles, rocket launchers, grenades aser night vision goggles bener helicopter ajanga arur par litsü nung NSCN-K aser KYKL tesep ana amakba atema Myanmar mepelai liasü.
Taküm June 4 nü Manipur kübok Chandel tesem nung Naga nunger telungpurtemi sepai 18 khasetba sülen Indian Army-i iba mapa ya inyakba liasü.
India sepaitemi Myanmar nung telungpur tesep amakba sülen anogo ishika lir National Security Advisor, Ajit Doval-i Nay Pyi Taw semdang aser Myanmar lennirtem den ajurutepa osang lemsatep.
India nunger sepaitemi par litsü nung ajemoka mapa inyakba atema Myanmar nunger lennirtem mepela aser ibaji atema Doval-i parnok dang Northeast telungpurtemi India anema inyaksangshiba osang metetdaktsü, ta ketdangserisa ashi.
Tan July 16 nü New Delhi nung Joint Consultative Commission (JCC) senden alidang Myanmar-i parnok mepelaba osangji India dang shiogo. Iba senden nung External Affairs Minister Sushma Swaraj aser Myanmar foreign minister U Wunna Maung Lwin nat külem ser menden shilem agi.
“Parnoki iba mapa inyakba magizükba metetdaktsüogo. Onok olemtepdang parnoki ibaji indangindanga ashi” ta sorkar ketdangserisa ashi.
Myanmar nung Northeast telungpur telok balala indang tesep 60 shi amenteta lir ta security agencies ajanga ashir. Item rongnung NSCN-K, KYKL, PLA, ULFA aser NDFB teloktem dena lir.
NSCN-K tanishir S S Khaplang ya Myanmarese Naga ka lir aser pai Myanmar kübok Taga jila nungi mapa inyaker.