Myanmar-i India nem NSCN(K) indang osang agütsür

New Delhi, Oct. 24, 2015 : Myanmar sorkar ajanga India nem metetdaktsüba osang ka ajanga angazükba agi, NSCN-K lenir S.S.Khaplang temang mejungi lir aser joko pa melena shimtsü asoshi par telok nung tebilemtsü adoka lir. S.S.Khaplang ya tang arishi küm 75 jungogo, ta angazüker.
NSCN-K telok nung shibai Khaplang melentsü ta asüba tebilemtsü tulu adoka lir ta asüba osang Myanmar-i India nem metetdaktsüogo. Kasa osang nung ashiba agi, tawa Myanmar nung NSCN-K lenir S.S.Khaplang ya shiranga mozü kidang monga liasü.
Taoba hopta nung India National Security Advisor Ajit Doval-i Myanmar semdangba mapang, pai Myanmar sorkar dang parnok teyari ajanga tang India sorkari kiralongrar telok kümtsür aliba NSCN-K teloki ken o jembidagi arutsüsa inyakdaktsünüba khuret ka agütsüogo. Iba ya India sorkari NSCN(K) ya ozüngi memelaba telok ka lir ta sangdongba sülen atalokba mapa ka liasü.
Iba jagi NSCN-K telok Unlawful Activities (Prevention) Act kübok nokdanga lir. ” Tawa mapang tatsüka tsüngdang NSCN-K teloki India sepai amakba mapatem ajanga India sorkari NSCN-K telok ya küm pongo asoshi ozüngi memelaba telok asütsü ta telemtetba agir metetdaktsüogo,” ta India sorkarisa metetdaktsü.
SS Khaplang ya NSCN (Khaplang) nung mendenbuba lir. NSCN telok ya 1988 küm lokti ana aküm aser telok anaji ka Khaplangi aniba NSCN-(K), aser tangabaji Isak Chishi Swu aser Thuingaleng Muivah nati aniba NSCN(IM) lir. Iba telok yabo tang India den yimjung nung yimten ken o süoka jembidagi.

You must be logged in to post a comment Login