Myanmar-i mepetmesü tia ajuruba tesemi teyari yoktsü ajungshir: UN

Yangon, November 09 (Agencies): Myanmar northwest tsütsülen kin o kin na tsüngda raratep adokba ajanga tila tanurtem nem temang agi meshitettsüsa timtem toushi tia bener arutsür ta shia, Myanmar linüki Muslim nüburtem lungsoa aliba Rakhine state-i nungdakba teyari osettsüset yoktsü melatsü tajungshiba olen ka United Nations (UN)-i tanü, Bodbar nü metetdaktsüogo.
Bangladesh arrtsülen tentetba police guard post nung bomb lendong tesashi ka taoba October ita 9 nü atalokdaktsüba anogo nungi tenzüka, iba tesem nung alir nübur nisung meyirijang jenti tanü chiyongtsü aser nungdakba mozü mora monguteti timtema aliba osang ka UN kübok UNICEF tenteti metetdaktsüogo.
“Myanmar nung timtem toushi ajurushia alirtem nem tawa teyari osettsüset aser chiyongtsü agütsüogo. Ajisüaka, teyari osettsüset peria agütsütsüsa tenokdangba sentongtem agientsü aser mozü ketdangsertemia tila tanur aser parnok kibongtem nem nungdakba mozü mora aser temang anepalutsü teyari agütsütsü atema lenmang sadema lapoktsütsü asoshi Myanmar sorkar ajungshir,” ta UNICEF-i sangoktsü.
Myanmar anüdoklentip tsütsülen tentetba Rohingya state nung alir telungpurtemi police züngsem 9-ji tepseta taoba October ita lendong atalokdaktsü ta temulung melemi bilema, Myanmar-i par mitkartem mepetmesü adokba tesemi yok aser iba mapang nungi tenzüka, mitkartemi par telungpur aser lendong atalokdaktsür mitsü mapatong inyakba nung ajemdaker, Maungdaw area telungi bendanger osangbenertem maidaktsüba den teyari osettsüset agütsütsü maparena nokdanga lir.
Ano, mitkartemi aibelenba kuli kecha meli nüburtem oda pua ayuba den okadak ken o mangadangi nüburtem injang agi kasetba aser tetsürtem tashiyim agi taküm raksaja, ozüng alema inyakba osanga bushiteta lir.
Par mitkartemi telungpur nisung 33 tashi tepsetba aser telungpurtemia mitkar zünsem 5 aser police ketdangser 1 tepsetba osang ka Myanmar sorkari ketdang asüba osangbentsü tentetia metetdaktsüogo.