Myanmar-i Rohingya nunger dang telungpur aputsü atema teyari meshir

Naypyidaw, September 3 (Agencies): Myanmar sorkari anüdoklentip tsütsü aliba Muslim nunger dang telungpurtem aputsü bushiba maparen nung yaritepang ta ayongzükogo.
Taoba ita telungpurtemi sepaitem amakba ajanga iba tesem nung tensa mejungi aküm aser Rohingya nungertem timtem toushi jenti ajurur.
Myanmar nung lennir Aung San Suu Kyi atema tayongzükba tulutibaji Muslim Rohingya nunger million 1.1 shi atema lir aser linük aikati lai Rohingya telok tilaba atema mapa meinyaktsür ta tai tongloktsür.
Taoba hopta mepetmesü adokba sülen Rohingya nunger 73,000 shi ka Myanmar toktsür Bangladesh nung oa jenoka lir ta Aid agency temi bushitetogo, ta UN refugee agency UNHCR regional spokeswoman, Vivian Tan-i ashi.
Deobarnüa refugee noklang aika Naf ayonga ajanger Bangladesh-i iogo. Tesüiba hopta ka shi rarayonga arudang nisung 400 jungnüa taküm samaogo.
Hokolbarnü Turkey tir Tayyip Erdogan-i Myanmar nung Muslim nunger anema mapa inyakbaji kin samatsütsü atema inyakba ama lir ta aitsüogo.
“Sepaitemi Arakan Rohingya Salvation Army (ARSA) züngsemtem aputsü bushitepba nung yaritepang ta Maungtaw nung yimdaklirtem dang loudspeakers ajanga metetdaktsüogo. Sepaitemi parnok yimtsüngtemi arudang prangpong-injang mesüra osettem bener amokmeren masütsü atema shiogo” ta Deobarnü Global New Light of Myanmar osangkaket nung ashi.
ARSA ya kiralongrar telok ka ta sorkari sangoktsüogo. Taoba hopta sepaitem amakba mapa atema parnoki tenüng agiogo.
Taoba hopta Maungni yimdaklirtemi ARSA züngsem ana apu aser ketdangser ket nung agütsü, ta osangkaket nungsa shia lir.
Rohingya telungpurtemi Rakhine nung monastery ana, Buddha indang noksatem aser school o kiojenten mi agi rongdoktsü. Yimtsüng balala nung parnoki kiojen 200 dak tema raksatsüogo, ta Deobarnü Army-i Facebook post ka nung metetdaktsü.