Myanmar-i yimjung tezüngzüktep October 15 nü agitsü

Nay Pyi Taw, October 04 (Agencies): Myanmar sorkar aser sorkar anemba telok 8-i par Nationwide Ceasefire Accord (NCA) tan October ita 15 nü zülutepa agitsü telemtetba ka tanü Deobar nü agiogo.
Myanmar sorkari tentetba Union Peace Making Work Committee (UPWC) aser sorkar anemba telok 15 rong nung telok 8-i tanü Nay Pyi Taw yimti nung tentetba Myanmar International Convention Centre nung ajurutepa senden ka amenba sülen yimjung tezüngzüktep agitsü anogoji lateta liasü.
Tanü senden nung shilem agir telok anaprongla nungi züngsem 10 shimteta NCA tezüngzüktep zülutepa agitsü maparen awashidaktsütsü asoshi teloktep luden ka tentetba osanga jangjaogo.
Parnoki küm 1 tejaklen nungi jembitepa aruba sülen UPWC aser sorkar anemertemi tentetba Nationwide Ceasefire Coordination Team (NCCT) telok nati taküm March ita nungtu NCA tezüngzüktep agitsü lemteta liasü.
Iba NCA tezüngzüktep zülutepa agir anogo 60 tsüngda nung telok anapronglai aginüba yimtenren onüktem bendenba sülen anogo 90 tsüngda nung par yimtenren ken o bentettsü senden amentsü sentong renema lir.