Myanmar-i yimtenren ken o nung puoka ayurtem chioker

Myanmar-i yimtenren ken o nung puoka ayurtem chioker

Myanmar Tir, Thein Sein-i aniba sorkari linük yimtsütsü tashi toktsüba jakdang yimtenren ken o nung ajemdaker tepuokdak pouka ayur nisung 52 tashi tanü Hokolbar nü chiokba sülen tanü chiokertemi kasa ken o nung ajemdaker tepuokdak puoka alir tanüngba nisungtema chioktsü takhangba benoka Yangon kübok Insein tepuokdak kimalen ola tulu adoka longkak aitba noksa nung angur. (Yangon, January 22)

 Yangon, January 22 (Agencies): Myanmar sorkari yimtenren ken nung o nung ajemdaker par tepuokdak puoka ayur nisung 102 rong nung mezüngbuba shilem tanü Hokolbar nü chiokba osang ka ketdangsertemi metetdaktsüogo.

Myanmar nung democracy yimsüsütsü yimya benoktsü asoshi nokdakla, Aung San Suu Kyi-i aniba National Democratic League (NLD) yimtenren teloki tentetba sorkar tasenbai Myanmar sorkar menden benoktsü anogo ishika anünga lia, Myanmar sorkari par tepuokdak puoka ayurtem ya tan chioker lir.

US Assistant Secretary of State, Antony Blinken-i tan Hombar nü Myanmar semdanga par linüki yimtenren ken nung ajemdaker tepuokdak puoka ayur nisung ajunga chiokadoktsü ajungshiba sülen Tir, Thein Sein-i aniba Myanmar sorkari tan par tepuokdak puoka alirtemji chioktsü tenzükogo.

Mitkar ket nungi yimsüsütsü tashi 2011 küm benoksang, Sein lenisüba kübok yimtenren aser rongsenren temelenshi tajung Myanmar nung bener arutsüba tembanga tan par sorkari tepuokdak puoka alirtem dang taochi sayur lir.

“Yimtenren ken o nung ajemdaker tepuokdak puoka ayur nisung 52 tashi tanü chiokogo,” ta Myanmar’er Assistance Association for Political Prisoners (AAPP) nung Joint Secretary, Bo Kyi-i osang jangjashitsü.

Myanmar tepuodak yimtenren ken o nung ajemdaker aitsür nisung 77 tashi maneni puoka aliba aser parnok anema benokba ken o okadak angatsü asoshi atar nisung 408 tashi aliba osang ka Kyi-isa shisem.

“Tan tepuokdak puoka alir nisung 102 tashi chioktsü renema lir. Ano, nisung 77 nem agütsüba tasüba agi merenshitsü o bendang melenshija parnok nem taküm tepiyong tepuokdak puoka ayutsü temerenshi agütsütsü renemogo,” ta Tir office nung director, Zaw Htay-ia metetdaktsüogo.

You must be logged in to post a comment Login