Myanmar lenila, Suu Kyi-i mitkar lenisang den senden ka amen

Yangon, January 26 (Agencies): Myanmar nung democracy yimsüsütsü yimya benoktsü asoshi tasü ita nokdakla, Aung San Suu Kyi-i Myanmar mitkar lenisang, Min Aung Hlaing den ajurutepa tanü Mongolbar nü senden ka amenba osang jangjaogo.
Suu Kyi-i aniba National League for Democracy (NLD) yimtenren teloki aniba Myanmar sorkar tasenbai taruba hopta nungi tenzüka Myanmar yimsütsü tashi benokba jakdang Suu Kyi-i Hlaing den tanü ajuruteper lir.
Lar NLD teloki Myanmar linük indang yimsüsü tashi benoktsü den sentakba onüktem Suu Kyi-i tanü senden nung benoka liasü.
Suu Kyi’er NLD yimtenren teloki yaküm, 2015 küm November ita agiba election nung vote noklang nung shilem 80 shi ngua takok anguba sülen Suu Kyi-i Hlaing den tan agi tanabenbuba senden amener lir.
Mongintemi ashiba agi, Myanmar nung mitkartemi tashi tulu bena aliba yong parnok den amalitep aliba ajanga dang Myanmar sorkari takok ngua yimsü sütettsü.
Ano, mitkartemi 2008 küm latetba linük temzüng nunga parliament menden shilem 4 nung shilem kabo mitkar lenirtem nem agütsütsü asoshi latetja aliba yong Myanmar sorkari mitkar lenirtem den amaliteptsüsüa akümba osanga jangjaogo.
“NLD teloki tetsükdakba kecha majurui sorkar tasenba tenteta Myanmar linük indang yimsüsütsü tashi benoktsü onük tanü benoka jembiogo,” ta Hlaing-ia tanü senden amenba sülen metetdaktsü.
NLD aser mitkar lenirtem naprongla shilem agiba sendenji ghonda 2 shi agia amenba osanga jangjaogo.
Linük temzüngi memelaba ajanga Myanmar linük Tir menden mebentettsüsa akümla, Suu Kyi-i Tir mendenji asangsang nung mebenaka, lai lar Myanmar madak yimsü asütsü renemba osang ka taoba mapang metetdakja lir.
Suu Kyi-i Myanmar linük Tir mebentettsüsa akümba ya melenshitsütsü nükjidong nung lar NLD teloki linük temzüng tasen küma yanglushitsü onük benoka lir saka mitkar lenirtemi iba onükji magizüki lir.