Myanmar lenila, Suu Kyi-i UN nung mezüngsüa onük jembi

New York, September 22 (Agencies): Myanmar lenila, Aung San Suu Kyi-i United Nations (UN) tesepti, New York yimti nung amenba 71 buba United Nations General Assembly nung onük jembia, yashi, Bodbar nü shilem agiogo.
Suu Kyi aser lai aniba National League for Democracy (NLD) yimtenren teloki yaküm, 2015 küm agiba election nung takok ngua, sorkar tasenba tentetba sülen Suu Kyi-i tan mezüngsüa UN nung onük jembia shilem agir lir.
“Ozü Myanmar nung kin o kin aser tamangba yimsü balala amanger rong nung mangatettep adoka tensa mejungi aliba mapang ka nung alimai ozü Myanmar tensa angateta, ozü linük den yariteptsü ajungshir,” ta Suu Kyi-i yashi senden nung metetdaktsü.
Lai tan UN senden nung shilem agiba ajanga la taküm nung aser lar Myanmar linüki mitkar yimsüsütsüren toktsür democracy yimsüsütsü yimya benshia, temelenshia agiba kuli angur.
Mepetmesü agi sünga aliba Rakhine state nung nütsüng yongsük timba alir Buddhist nüburtem aser nütsüng yongsük ajema alir Muslim Rohingya kin na tsüngda 2012 küm nungi tenzüka tongpang kanga sashia raratsü tenzük aser tongpang raraba ajanga Rohingya nisung timba densema, tanü tashi nung nisung 100,000 dak temai pei talidak anisüngzüka melitettsüsa küma, jenokdak balala nung jenoka aliba osang bushitetogo.
Rakhine nung alir Buddhist nisungtemi Rohingya nisungtemji kidangsüa aliba Bangladesh linük nungi ozüng alema Myanmar nung jenoka alir ‘Bengali’ nisungtem ta züngshir.
“Myanmar sorkar tasenbai kin kati kin tanga ajemrepa alitsü merangba anema tasüita nokdaktsü tenzüka lir. Rakhine state nung alir nübur ajunga rong nung yimji yimjung aser terenlok lidaktsütsü nükjidong nung ozü sorkari bendanga agüja inyaker,” ta Suu Kyi-i shisem.
Arishi küm 71 tain Suu Kyi küm 15 shi lar kidang pua ayuba sülen küm 5 tejaklen nungi tenzüka, Myanmar nung yimtenren temelenshi agitsü tenzük aser yaküm November ita agiba election nung Suu Kyi-i aniba NLD teloki temaba jenjang ajangzüka, Myanmar sorkar tasenba tentettsü temeten ngua liasü.
Mitkartemi yimsüsütsü tashi abendang latetba linük temzüngi memelaba yong Suu Kyi-i election nung takok ngu aka, lai Myanmar Tir menden abentsü temetenbo monguteti lir.