Myanmar lenirtemi amaliteptsü ajungshir: Sein

Nay Pyi Taw, February 12 (Agencies): Myanmar linük terenlok aliba aser democracy yimsüsütsü yimya benshiba linük ka kümdaktsütsü asoshi Myanmar lenir ajungai amalitepa nungdakba maparen inayktsü tajungshiba olen ka Myanmar Tir, U Thein Sein-i tanü, Hokolbar nü sangoktsüogo.
Myanmar linüki agiba 69 buba Union Day anogomong sentong nung o jembidang Sein-i tanü iba tajungshiba olenji metetdaktsü.
“Myanmar linük temaba jenjang nung ajungkettsütsü khuret sorkar tasenba nem amoktsütsü terenemshiba agitsü tenzükogo,” ta shia, Myanmar linük ajunga ka küma lungjemtsü nungdakba olen ka pai lemsatep.
“Myanmar sorkar, parliament, mitkar aser sorkar anemer lenirtemi yaküm, 2015 küm October ita 15 nü otsüsütsüsa yimjung tezüngzüktep zülutepa agiba sülen Myanmar linüki tejakleni tongti mera agitsü tenzüka lir,” ta Sein-i metetdaktsü.
Yaküm agiba yimjung tezüngzüktep nung shilem magirtem asoshi tangasa yimjung tezüngzüktep agitsü maongka lapokja aliba olen ka paisa metetdakja liasü.