Myanmar linük temzüng tajungba küma yanglushitsütsü: Suu Kyi

Naypyidaw, April 18 (Agencies): Myanmar Foreign Minister, Aung San Suu Kyi-i lar linük temzüng tajungba küma yanglushitsü tenangzükba olen ka tanü, Hombar nü metetdaktsüogo.

Myanmar linük asangsang nung democracy benshiba linük ka kümdaktsütsü nükjidong nung mitkartemi taoba mapang latetba linük temzüng melenshia kasaji tajungba küma yanglushitsü asoshi Suu Kyi-i tanü nangzüka liasü.

Myanmar nung alir kin balala kasa jenjang nung benshitsü densema, par Myanmar ajunga tanaben sentaktepshitsütsü nangzükba olen ka tanü sangoktsüdang Suu Kyi-i tanü iba olenji metetdaktsü.

Tesüiba mapang Burma ta ajaba Myanmar linüki Britain yimli nungi 1948 küm nüchiso anguba sülen par linük alir kin o kin balala rong nung mangatettep adoka tongpang raraba ajanga tensa mejungi kümdaktsüba osang bushiteta lir.

Tang Maynmar linüki benshiba linük temzüngji Myanmar madak küm aika yimsü asür, mitkartemi latetba temzüng lir aser iba temzüng nung mitkar lenirtemi nem parliament menden shilem 25 agütsütsü aser home affairs o defense minister menden na densema, tongti minister menden 3 tashi mitkar rong nungi shimba yimsüsür nem bendaktsütsü asoshi ozüng lateta lir.

Ano, bendanger den kibong akümer mesüra pei chirnuri bendang senso agia alirtem nem Myanmar Tir menden abentsü temeten linük temzüngi agüja maliba yong Suu Kyi-i election nung takok tulu nguaka, lai Myanmar Tir menden abentsü maongka monguteti lir.

Aji oda, Noble Peace sempet agizükla, Suu Kyi-i Myanmar Foreign Minister abenba den külemi, State Counselor mendena repsema bena, Tir Htin Kyaw-i aniba sorkar nung tongti shilem agitsü tenzükogo.