Myanmar mitkartemi ozüng alema meinyaktsü ajungshir: Annan

Yangon, December 07 (Agencies): Myanmar mitkartemi ozüng alema meinyaktsü tajungshiba olen ka taoba United Nations (UN) Secretary General, Kofi Annan-i tanü, Mongolbar nü sangoktsüogo.
Myanmar anüdoklentip tsütsülen, Rakhine state nung nübur jenti aliba Buddhist nisungtem aser nütsüng yongsük ajema alir Rohingya nisungtem na tsüngda mangatettep adoka, raratepbaren azüoktsü atema Myanmar sorkari par mitkartemi Rakhine-i yok saka parnoki tashiyim amshia, ozüng alema inyaka, tai maketba nübur ishiba agi nisung 86 shi oda tepsetba osang bushitetogo.
Rakhine nung tensa kanga mejungi akümtsü tenzükba ajanga idakji alir nübur nisung 10,000 dak temai pei talidak melitettsüsa küma, tanga tesem nung jenoka alitsüsa tia ajuruba osanga jangjaogo.
Tan Myanmar-i ajurushiba timtem lendong tensaji par lenila, Aung San Suu Kyi-i aniba sorkar tasenbai yimsüsü tashi benoker ita 8 buba tashi nung lendong tesashitiba ajurur lir.
Mitkartemi par mitkar mapatong inyakdang nübur nem agütsüba temeten anema meinyaktsü tajungshiba olen ka Myanmar nunger Buddhist aser Muslim Rohingya na tsüngda adokba mangatettepbaren bentettsütsü atema tentetba luden lenisang, Annan-i metetdaktsü.
“Tensa azüoktsü aser nübur nem agütsüba temeten anema inyakbaji khen yongi balala lir. Mitkartemi par mitkar mapatong inyakdang nüburtem teti kümzüktsü atema tamasa inyaktsü nungdaker. Anungji, Myanmar mitkartemi ozüngi melaba ama par mitkar mapatong ajunga inyaktsü ajungshir,” ta pai nenshia ashi.
2012 küm nungi tenzüka, Rakhine Buddhist aser Rohinya Muslim nisungtem na tsüngda mangatettep adoka, kanga sashia rarateptsü tenzükba sülen tanü tashi nung nisung 100 dak tema asüba osang bushiteta lir.