Myanmar museum nung raradang apuertem sayatsü

Yangon, January 03 (Agencies): Myanmar kübok Kayin state nung aliba ‘Death Railway Museum’ nung alemli rara mapang puer train lenmang yangludang asürtem sayatsü, ta ketdangsertemi Deobarnü metetdaktsüogo.
Iba museum ya shitakbabo taküm April ita nungang lapoktsü sentong liasü ajisüaka linük nüjiso anguba anogo den repa amungtsü mechi nung January 04, 2016 nü lapoktsü lemtetogo, ta Xinhua news agency ajanga metetdaktsü.
Iba museum nung otsüsütsü noksatem, nisungi yangluba noksatem, süng aser lung agi chiteta yangluba osettem aser “death railway” indang 3D noksatem sayatsü. Kasa museum nung death railway nung jajaba C-0522 engine keta aliba, mejang agi jajaba train-a ka sayatsü. Otsü agi ashiba agi train mezüng jajatsü tenzükbaji death railway tesem ya lir.
World War II mapang, Japan Imperial Army temi rara mapang pua arur parnok nisung 120,000 shi den Asia anüolentip tsütsü nungi anir aruba alartem nem tashiyim agi Thanbyuzayat, Myanmar aser Kanchanaburi, Thailand na sendaktepa train lenmang yangludaktsü.
Iba train lenmang yangluba mapang rara dang pua arur parnok 16,000 dak tema asü aser parnok tasür rongnung meyirjang aika Thanbyuzayat nung aliba leper nung rema toktsü.
Parnok rongnung nisung aika mozü peria maliba ajanga wara aser tashidak balala agi tonger kanga okronga asü.