Myanmar Naga lushi nung alumena lir

Dimapur, June 09 (TYO) : Myanmar kübok aliba Naga nungertem alidak Tsüngrem mapa inyaktsü asoshi tang ya mapang tajung lir, anungji memenui iba wadang nung Nagaland nung aliba Naga nungertemi, talisa Aoertemi tetsüng ajemoka inyakdaktsüner, ta Konyak Baptist Bumeinok Bangjem, Myanmar ( KBBBM) nung Executive Secretary Rev.Sapbai metetdaktsü.
Pai iba o ya taoba Deobar nü Myanmar arrtsü nung Longwa yimtak Tir Yimyim yimozülur den sensaksemdang shia liasü. KBBBM ta asübaji Konyak oshi nung Konyak Baptist Arogo Mongdang Myanmar ta ajaba tenüng lir.

Myanmar nung Konyak nunger yimtsüng 19 lir aser ajak nungji arogobo tenteta lir saka tamangertemji tenüng agi dang amangba Khristantem dang lir, anungji Myanmar Konyak arogotem asoshi teyarirtem kanga nüngdaker ta Rev.Sapbaisa ashi.

Rev.Sapba ya Impur Bible School nung züngtetba Tsüngrem tenzüker ka lir. Pa ya Chingkao (Konyak) Baptist Arogo nung Yaongyimsen nunger Rev.Sosang, pa pastor aliba mapang par arogoi yaria züngdaktsüba laishir ka lir.

Ano, Myanmar nung tanga Naga kintemaika lir aser parnok rongnungji aika tang tashi Yisu osang tajung agimatongba tesem aika lir. Parnokji nisungtemi shirurumesük ta aser shirurutemi nisungmesük ta reprangtsüsa tia ka nung lir ta Lainung nung inyaker Evangelist kati metetdaktsü. Lainung ya Myanmar nung alibaNaga kin ka lir aser parnoki parnok alidak Lainung lushi nungi Longwa (Nagaland) yimatongtsü tetsüng agi anogo trok nü agir. (Maneni tapak 9 nung…)