Myanmar navy-i tasümangtem ngutetogo

Naypyidaw, June 10 (Agencies): Taoba Bodbarnü Myanmar anüdoklentip tsütsü mitkar tayimtsü ka tsükokba sülen bushitepa arudang Myanmar navy rongtemi tasümang aika ngutetogo.
Navy indang rongtemi Andaman sea nung yipru ajangdanga tayimtsü tsükokba bushiyonga arur aser parnoki tanü mang ka ngusemogo.
China-i yangluba Shaanxi Y8 tayimtsü nung nisung 122 mena liasü. Parnok rongnung tanur den sepaitem indang kinungertem dena liasü.
Tanep navy indang rong kati tzüyim nung tasümang ka ngutetogo aser ibaji züngsem tang tashi nung mang 33 ngutetogo, ta osang ka ajanga metetdaktsü.
Myanmar-i tayimtsü bushiba maparen nung China-ia yariteptsü mulunga lir ta tanü osang ka ajanga metetdaktsü.
China ya kidanger tajung ka lir aser Myanmar’er tejashi lemsateper, ta China tir Xi Jinping-i Myanmar tir U Htin Kyaw dangi shidi ka nung lemsatep.
“Xi-i tasürtem atema mang ayimba aser Myanmar sorkar o nübortem den tejashi lemsateper ta shidi nungsa shia liasü” ta osang ajanga metetdaktsü.