Myanmar nung democracy temelenshi bener arutsütsü: General Min

Myanmar yimtiba, Naypyitaw nung agiba Armed Forces Day anogomong sentong nung Myanmar Commander-in-chief, General Min Aung Hlaing-i gari ka nung nokdaker shilem agiba noksa nung angur. (Naypyitaw, March 27)

Naypyitaw, March 27 (Agencies): Myanmar nung terenlok alitsü aser nüburtem taküm jenjang tajungba kümdaktsütsü nükjidong nung Myanmar nung democracy yimsüsütsü yimya den sentakba temelenshi asangsang nung bener arutsütsü tenangzükba olen ka Myanmar mitkar lenisang, General Min Aung Hlaing-i tanü, Deobar nü metetdaktsüogo.
Naypyitaw yimti nung agiba Armed Forces Day anogomong sentong nung shilem agidang pai iba tenangzükba olenji tanü sangoktsü.
“Myanmar nung yimji yimjung aser terenlok bener arutsütsü asoshi ozü mitkartemi ajak den amaliteptsü nangzüker,” ta pai nenshia ashi.
Paisa ashiba agi, ozüng alema inyakba aser Myanmar sorkar anemer telok tenteta aliba ajanga par Myanmar nung democracy yimsüsütsü yimya asangsang nung benoka benshitsüren nem tetsükdakba bener arutsür.
Myanmar nung democracy yimsüsütsü yimya benshidaktsütsü asoshi tasü ita nokdakla, Aung San Suu Kyi-i aniba National League for Democracy (NLD) yimtenren teloki mitkar ket nungi yimsüsütsü tashi agizüka Myanmar madak yimsü asütsü anogo ishika anünga alidang mitkar lenisangi tan par tenangzükbaji metetdaktsür lir.
Yaküm, November ita agiba election nung takok tulu nguaka, linük temzüngi bendanger den kibong akümer mesüra pei chirnuri bendang senso agia alir nem linük Tir menden abentsü temeten agüja maliba yong Britain nunger den kibong akümba den külemi, jabaso anapronglai Britain senso agia alila, Suu Kyi-i Myanmar Tir menden abentsü temeten monguteti lir.
Ajisüaka, lai temulung lemtetba tembar, Htin Kyaw-i Tir menden abentsü maongka ngua lir aser pai aniba sorkar tasenbai taruba April ita 1 nü nungi tenzüka Myanmar madak yimsü asü tenzüktsü renema lir.