Myanmar nung menoknok sashia anok, India-a kongshi

New Delhi, August 24 (Agencies): Bodhbarnü central Myanmar nung menoknok Richter Scale 6.8 nung anoko, ta U.S. Geological Survey osang ajanga metetdaktsü.
Ali telunglen kilometer 84 iir anokba menoknokji ajanga Thailand yimtiba, Bangkok nung ki talang aika ayipshishidaktsü, ta osangbenertemi ashi.
Iba menoknok ajanga tanur ana densema nisung asem süogo.
Menoknok anokba tiyongtsüji Myanmar yimtiba, Naypyidaw nungi kilometer noklang aika pilar aliba jila Chauk anasa liasü.
Magway region nung regional MP, Soe Win-i osangbenertem dang, iba menoknokji minute aika anoka liasü, ta ashi.
Paisa, “Ola-a kar liasü. Salay nung pagoda ka chirep aser building-a ka chirep,” ta ashi.
2012 küm sülen Myanmar nung menoknok lendong tulu matalokaka iba linük nung menoknok kanga bulua anoker.
Kasa menoknokji India nunga Bihar, West Bengal, Odisha, Assam aser Tripura state tem nunga meteta nisungtem kanga tsübutepa liasü.
Ministry of Earth Sciences unit, National Centre for Seismology-i ashiba agi, Myanmar nung iba menoknokji nikongdang 4:04 ako meta anoka liasü.
Mongolbarnüa Assam nung menoknok anaben- anepdang 5:30 ako nung Richter Scale 3.1 nung aser anepdang 7:41 ako meta Richter Scale 5.5 nung anoka liasü.