Myanmar nung mezüngbuba neburtem Tir, Htin Kyaw

Myanmar linük nung küm 53 tashi sepai yimsüsüba (military rule) kübok lir külen March 15, 2016 nü arishi küm 69 tain Htin Kyaw mezüngbuba linük nung neburtem Tir asütsü asoshi Myanmar Parliament-i shimtetogo.
Züngsem 652 rongnungi züngsem 360 vote nguteta National League for Democracy (NLD) Party nungi Htin Kyaw, Myanmar Tir asütsü shimtet.
Nobel Peace sempet angula aser NLD party nung tongti lenir Aung San Suu Kyi den Htin Kyaw ya akang tembar lir. Sepaitemi yimsüsüba küm pungo tembanga tan March ita tashi lir külen Htin-i Tir tang teinyakdak Tir Thein Sein melenzüktsü.
Htin ya  1946  küm July 20 nü aso aser pa tsürabur ya kaket, ocet zülur aser akhidang NLD nung züngsem tajung süa liasü. Taoba mapang Htin-i University nung tesayur-a inyak aser 1970s aser 1980s mapang Myanmar Ministry of Industry nung inyaka liasü.
2015 küm November ita General election mapang NLD teloki otsüsütsü süa Parliament anaprongla nung takok kanga junga angu. Aji oda süaka Myanmar linük nung 2008 küm temzüng nung renema aliba ama, pei chirnurtem shirnoksa tanga linük senso agia ali parnok tsürabur nemjibo linük nung Tir menden atema tokteptsü memelatsü ta renema lir. Yamaji, temzüng nung aliba ama Aung San Suu Kyi’er chirtema British senso kümer aliba ajanga la Myanmar Tir menden nung tokteptsü lenmang maliasü.
March 10, 2016 nü Myanmar linük nung tatong Tir House of Representatives (Lower House) asütsü atema NLD-i shimtet. March 11, 2016 nü parliament nung züngsem (Elected MPs assembly)317 rongnung 274-i vote agüja  Tatong Tir asütsü shimtet. Iba sülen ano March 15, 2016 nü Assembly of the Union (Union Parliament) nung 652 MPs rongnungi parnok 360-i vote agüja President asütsü shimtet.
March 17, 2016 nü Htin Kyaw-i sorkar tasen akümtsü atema ministry 21 den minister 18 shimteta Union Parliament dangi benokogo.
1973 küm Htin Kyaw-i  Su Su Lwin den kübong aküm, aser laji tang House of Representatives MP teinyaktak aser International Relations Committee nung mendenbuba lir.
Pa English Methodist High School nung 1962 küm graduate asü aser 1968 küm M.Economics renem. 1970 küm University Computer Center nung programmer/system azüng. 1971 nungi 1972 küm tashi Institute of Computer Science, London University nung computer agi aser 1974 küm Asia Electronics Union, Tokyo nung computer studies nung aden. 1975 küm tanaben computer science nung master degree renem aser Ministry of Industry nung Deputy Division Chief inyak.
Foreign Economic Relations Department kübok Ministry of Planning & Treasury nung pa Deputy Director shim aser pai 1992 küm sorkar mapa nungi pai pasasa anen.
September 22, 2000 küm Aung San Suu Kyi-i Yangon yimti toktsür aotsü meranga inyakdang Htin Kyaw-ia shilem agiba ajanga pa Insein tepoukdak ita pezü puoka ayu.
2012 küm Daw Khin Kyi Foundation nung Htin Kyaw senior executive inyaka liasü. Iba foundationji Aung San Suu Kyi-i tetsü Khin Kyi nüngtem lapokba liasü.
National League for Democracy (NLD party nung mongin mesüaka Aung San den akang tembar asüba ajanga pa nem NLD party office nung mendenbuba süa inyaka aru. Aser pa dak ochi, mulungsentsü temerük aser tazüngba nunga kanga ajungba yong Myanmar linük atema Tir asütsü Htin Kyaw shimtet ta Aung San Suu Kyi-i metetdaktsü.