Myanmar nung Naga nunger tia Democracy sülen

Myanmar nung putu aika sepai yimsüsüba kubok nebur rishikangshi tulu liaka Naga nunger Myanmar nung alirtem atemabo Naga Baptist Convention (NBC) aser NagaYuya benjong agitsü tenokdangba makai jenjang tila ka lapoktsüba ajanga Naga nunger Myanmar nung alirtemi asen Naga suiren, raren, sobaliba, libaliro aser Christian tamangba mesamai tanen maka benshia aru.

– IMRONGSUNGBA, ARKONG WARD – MOKOKCHUNG.

Myanmar nung Naga kin – Anal, Konyak, Lamkang, Leinong, Makury, Moyon, Khiamniungan, Para, Somra, Tangshang – putu aika sepai yimsüsüba kübok kanga rishikangshia lia aru. Pei lima aser kibong dang nungibo pei takum kumzüktsü, sepai tamokpangba nungi, tulutiba sür tetsübu tensa tia nung lia aru.
Kodang 7th November 2010 kum Myanmar nung election agi, iba election sülen (Democracy) Naga kin Myanmar nung alirtem atema lenmang aisü nung tajangzük tulu ngua arudar. Küm shia 15th January nü Naga nunger Myanmar nung alirtem atema benjong tulutiba “NagaYuya”, Naga Public Organisation (NPO) achaayang kubok, mungtepdang Myanmar sorkar nungi teshimtet lenir (Elected Member) tem jaoka Naga nunger alidak jila balala nung melentepba benjongtepba arudar. Iba benjong nung Naga kin (Myanmar) balala nungi pei yartsüngsang, sobaliba ken aser tetsü-tebuo inyakyim tapu aika sayutepba ajanga longsoteper. Ano tanü putu nungbo Naga kin (Myanmar) balala nungi pei dak aketba sempet balala ajanga inyaktetba osettsüset yokteper, aser ano temelenshi tulutiba kaji joko Naga lanur (Myanmar) tazüngertemi sentong topur ajungtsü mechi tanga temesüng lima nung jiluba jilu teimba ka jiludagi.
Myanmar nung tenüng agibo pei melungba tamangba yimsü amangtsü (Freedom of religion) ta liaka sepai tamokpangba ajanga Christian tamanger tem kanga tsübuseta timtemtepa amanga aruogo. Tanübo joko asangsang nung Naga Baptist Convention (NBC) achaayang kubok Naga kin (Myanmar) shia Arogo Mungdang tentetter mapang ajak nung anisüngzük tulu nung jangratema sentong balala agia Tsüngremer wadang mangdang talang yur yim arogo temi inyaka arudar.
Myanmar nung tesasatsü mapang talang ka tesangwa, tzü, lenmang aser tongtepratep kecha makai putu aika sepoy yimsüsüba kubok lia arudang par linük tulutiba ka rajang (Retardation) kümdaktsü. Democracy sülenbo joko Naga nunger yim (Myanmar) teimba ka nung lenmang yanglua arudar, tzü yim teimba ka nung mesüa arudar aser anü-ajanga-agutsüba tesangwa (Solar Light) oset yimtsüng nung kibong shia dangi lemshia arudagi. Ano tanemi tongteprateptsü (Telecommunications) lenmang balala nungi bushitepba amenloktsü merangtepdagi.
Sepai yimsüsüba kubok alidang kaket shisaluyimba nung asen Naga nunger (Myanmar) kanga teküpboktiba jenjang nung yutsü; shisaluyim dak (School) Burmese oshi dak alaka kecha oshi agi sayutsü memela, tesayur nem ita sen onsara ishira (tenüng agi) agütsü, aser political-social-economic-religious renloktsü (Development) onük kecha Myanmar litsü kübok sayutsü memelai aru. Saka tanübo shisaluyim dak Burmese aser English oshi agi sayutsü mela aser tesayur nem ita sen alemli nungi teimba agütsür. Shisaluyim dak tasen yim aika nung lapoka odar aser tesayur akümtsübuba jenjang jia onsara ajungketogo. Ano Naga Public Organisation-i shisaluyimtsü asoshi Naga nunger (Myanmar) alidakbo Nagamese tesayur shimtsü tezuluba nung Myanmar sorkar nem agütsü aser iba tezüluba jia memenui ataloktsütsü amanger.
Naga nunger (Myanmar) asoshi rishikangshi, sepai yimsüsüba kubok alidang, tulutiba kaji asen Naga nunger (Myanmar) teburtem teimba ka Myanmar sepai indang khu bener anogo, ita aser küm jungnüa pei ki toktsür Myanmar tekong-tenem miinlushi tulu ajunga ajangdanga timtemseta senzü aser külen pei kinungtsü aser chirnurtem yimtsüng nung tama kangshitsü agi Myanmar sepai-i kangshi. Myanmar sepai-i Naga nunger (Myanmar) dang o ka ashibaji, “Nenok Naga nungeri onok meyong kor (Horse) ajak 1975 -76 nung tepset, anungji kor melen nenok Naga nungeri onok meyong khu abentsü” ta shia aru. Saka tanübo item rishikangshi ajak tu tanemi anenogo.
Tako agi tanang asen Naga nunger (Myanmar) tia Myanmar nung kümdagi. Joko democracy sülenbo “Naga Hills Administrative Zone” ta Myanmar sorkar-i yimyim agütsü, aser iba inyakyim takok ngua aotsü mechi Myanmar sorkar-i achaayanger tejangja lenisüba kubok Naga nunger (Myanmar) timtem aser taginüba reprangtsü tenzükogo. Oda, putu aika sepai tamokpangba kübok lia aruba ajanga Naga nunger Myanmar nung alirtem shisatsü rajang kümdaktsü saka iba democracy sülenbo Naga nunger Myanmar nung alirtem tanemi tejakleni aotsü asenok ajak tamang aser teimla.