Myanmar nung police-i Buddhist nunger 2 apu

Yangon, May 12 (Agencies): Myanmar police-i Buddhist nunger talila bilemloka oa amanger nisung ana apu. Linük yimtiba Yangon nung Muslim nunger den raraba atema police-i tena apu aser ano maneni nisung kar aputsü bushidar.
Mongulbarnü Yangon district nung Patriotic Monks Union (PMU)-i Muslim nunger aliba tesem nung ki kar mita aodang, mepetmesü adoka raratep aser iba mapang police-i anüng nung injang ana khadoktsüsa aküm.
Hopta ana tejaklena item kasa nisungtemi Muslim school ana tashiyim agi shibangtsü.
“Onoki nisung ana puogo aser ano tanüngba nisungtem aputsü atema bushitepdar” ta Police Major Khin Maung Oo-i osangbener dang ashi.
Myanmar nung Buddhist aser Muslim nunger tsüngda mepetmesü adokba ajanga nisung aika taküm samaogo aser meyirjang aika talidak toktsür jena ogo.
Yaküm October ita Rakhine state nung Rohingya Muslim telungpurtem sepaitem amakba sülen mepetmesü tuluba aküm. Iba tatalokba sülen Rohingya Muslim nunger meyirjang 75 shi ka Bangladesh nung jenok.
Aung San Suu Kyi-i aniba ita 13 sorkari linük atema tali bilemoka oa inyakertem azüoktsü atema mapa inyaka arur, aser tang Buddhist nungertem apuba ajanga sorkari mapa takangba inyakba kuli sayur.
Yangon nung regional police security command, commander Brigadier General Mya Win-i ashiba agi, “telok balala tsüngda rara nokdangtsü atema police tem tesem aika nung mapa lemzüktsüogo. Onoki Muslim nunger aliba tesemtem mita anüker aser tekülem ki anasa security akangshiogo.”
Muslim nunger anema inyakba PMU telok nung lennirtemi ashiba agi, parnoki Ma Ba Tha sülen anidaker.
Ma Ba Tha telok ya tali bilemloka oa amanger Buddhist nungeri tentetba lir aser parnoki Muslim anema noktaker. Iba telok nung lennirtem rongnung Wirathu dena lir aser pai pa sasa “Myanmar’s Bin Laden” ta ajar.