Myanmar nung political prisoner nisung 61 chiokogo

Nay Pyi Taw, April 10 (Agencies) : Myanmar nung yimtenren dak sentakba ken o nung tepuokdak yua alirtem parnok nisung 61 anema ken o agienatokba ajanga parnok tepuokdak nungi chiokogo, ta Deobarnü ketdangsertemi sangdong ka ajanga metetdaktsü.
Deobarnü parnok nisung 61 chiokba zünga tang tashi nung kasa ken o kübok tepuokdak puoka alir parnok 199 chiokogo aser item rongnung tetsür 36 densema lir, ta Xinhua news agency osang ajanga metetdaktsü.
Parnok ya Bago, Magway, Yangon aser Mandalay tesemtem nung aliba tepuokdak nungi Honibar aonung chiok.
State Counselor Aung San Suu Kyi-i Myanmar küm tasen benjung atongtsü hopta ka jilia yimtenren dak sentakba ken o nung tepuokdak yua alirtem chioktsü mepishiba anga-a linük ketdangsertemi item nisungtem chiok.
March 30, 2016 nü linük nung sorkar tasenbai yimsü asütsü tenzüker tan mezüngsüa parnok chiokerba lir.
Myanmar nung taruba Mongulbarnü nungi tenzüka tzü benjung ajurua office sodi asütsü, ajisüaka tarutsü anogotem nung ano iba ken o nung puoka alirtem aika chioktsü imlar.