Myanmar nung rü aser yipru lendong nung nisung 8 asü

Yangon, April 24 (Agencies): Myanmar nung golf ball tasazük nung rü tsükba ajanga lendong balala nung nisung 8 taküm samaogo aser kiojen aika raksatsüogo, ta Deobarnü ketdangsertemi metetdaktsü.
Myanmar nung hopta aika kanga tatsük aruba sülen Hokolbar aser Honibar anogotem state pungu nung yipru aonba aser rü tsükba ajanga teraksa jenti angu, ta parnokisa ashi.
“Lendong balala nung nisung 8 asüba aser kiojen 7,500 raksaba osang tang tashi nung angazükogo” ta Ministry of Social Welfare, Relief & Resettlement director, Phyu Lei Lei Tun-i osangbener dang ashi.
Tasürtem rongnung par trokji Mandalay kübok Yay Tha Yauk yimtsüng nungi liasü. Ano, Sagaing Shan, Chin aser Magway state tem nunga teraksa ajurua lir.
Global New Light of Myanmar osang ajanga ashiba agi, Hokolbar aonung Shan state nung yipru tesashi aitba ajanga Buddhist nunger tekülem ki 1,700 shi raksatsü.