Myanmar nung sepaitemi ‘Meth’ süngjang shibelenba apu

Yangon, May 2 (Agencies): Myanmar kübok Rakhine State nung sepai ketdangser ana den tangar ana ozüng alema shibelenba mozütem bena lia apu, ta police osang ka ajanga metetdaktsü.
Bangladesh nung meth tablets (methamphetamine) kanga bulua amshiba ajanga arrtsü adena Myanmar nungi iba mozü shibelener, ta bushisüngdangertemi ashir.
Rakhine kübok Butheedaung township nungi Maungdaw-i aoba lenmang nung nisung pezü checkpoint ka nung apu, ta local border guard police officer kati ashi.
“Hombarnep police telok kati Major ka den sepai ka aser Rakhine nunger ana ket nung mozü bena lia apu” ta paisa ashi.
“Mitkar ketdangser aser sepai naji mitkar temzüng kübok ken o benoka angadangts. Iba jagi onoki tena local military command ket nung agütsüogo” ta police ketdangserisa metetdaktsü.
Parnok ket nung bena aliba mozü indang jenjangji sen 880 million kyat ($650,000) shi asütsü, ta paisa shisem.
Maungdaw jila nung Police major Kyaw Mya Win-ia nisungtem apubaji shitak ta ashi saka pai iba dak sendakba osang kecha balaka memetetdaktsü.
“Border guard police-i Hombarnep gari ka nung stimulant tablets 440,000 shi apu” ta pai ashi.
Alima nung mozü teimba yangluba linükji Myanmar lir aser iba linük nung opium, cannabis aser “yaba” ta ajaba caffeine enoka yangluba methamphetamine pills yanglur.
Yaküm police-i mozü süngjang million 98 tashi apu aser iba ya 2015 küm million 50 apuba nungi anasü shi ka liasü.
Mozü teimbaka China den arrtsü aliba tesemtem nung telungpurtemi yanglur aser Southeast Asia ajanga belenshir.
Myanmar nungi Bangladesh-i Meth tablets shibelenbaji Naf ayong ajanga belener. Iba ayong ya ajanga linük ana arrtsüa lir aser iba tesem nung Rohingya Muslim nungertem alir.