Myanmar nung tayimtsü tsükokba ngutetogo

Yangon, June 08 (Agencies): Nisung 122 mener samaba mitkar indang tayimtsü teraksa aser nisung tasümang tem ngutetogo, ta Myanmar mitkartemi metetdaktsü. Iba tayimtsü teraksa ya Andaman Sea nung prokshia aliba ngutet, ta mitkar indang Facebook nung shia lir.
China nung yangluba Y-8 tayimtsü nung ya tayimtsü ketdangser 14 liasü. Iba tayimtsü nung mena alirtem ya timba mitkartem aser parnok kinungertem den tanur densema liasü.
Iba tayimtsü ya Myeik nungi Yangon-i Bodhbarnü aoba mapang tayimtsü anendak nungi abusor ghonda ka majungdang ola-osang agitepba sama.
Brehostibarnü teroto mapang tashi nung iba tayimtsü samar aliba bushirtemi nisung tasümang 29 – tetsür 20, tanur 8 aser tebur tain ka – ngutet, ta mitkartemi ashi.
Tang tashi iba tayimtsü tsükokba kuli tejangja monguteti lir. Iba tayimtsü ketdangser temi teyari meshia ola adokba osang kicha mali aser tayimtsü teraksa tem tesem balala nung prokshia aliba ajanga iba tayimtsü ya anüng tom nung lia raksa südi, ta kuli sayur.
Iba tayimtsü ya taoba küm March ita nung China dang nungi alizük aser iba tayimtsü ya anüng nung ghonda 809 dang yima jajar liasü, ta kasa osang ajanga ashi.