Myanmar nung tzümetsüng agi 47 shi süogo

Kale (Myanmar) : Magway Region, Myanmar nung kümzükba  maparen inyakertemi tzümetsüng agi kongshiba tesem nung aliba nüburtem den kiset shiruru dena lendong tesem nungi anienba noksa nung angur.

Myanmar, August 2 (Agencies): Myanmar nung tzümetsüng tulu adokba ajanga tasüba aika jangjatsü, ta UN-i shiogo.
Iba tzümetsüng tulu adokba sülen anüolen region pezübo lendong tesem, ta osang sangdongogo. Iba tzümetsüng ya tan mei mapang tzünglu tesashi aruba ajanga lir aser tang tashi nung nisung 47 tashi taküm laluba osang jangjaogo.
Ajisüaka tang tashi nung kümzüktsü mapa inyakertem tonga maru aser tzümetsüng kanga mejungi aliba tesemtem nungi maneni osang agitepdar.
Mei mapang tzünglu alubaji yimya dang, ajisüaka Myanmar/Burma nungeri BBC dang ashiba agi tan hopta ishika aruba tzünglu ya balaka lir.
Parnoki Komen ta ajaba Cyclone ka ajanga tzünglu aser mopung bener aruba ajanga teraksa balaka adoka liasü.
Deobar nü UN nung Coordination of Humanitarian Affairs ajanga ashiba agi, iba tzümetsüng tulu ajanga tang tashi nung district 12 senteper nisung 156,000 tashi talidak makai kümdaktsüogo aser iba züngdangba ya taliang akümtsü.
UN-i ashiba agi, Rakhine state nung Rohingya Muslim nunger nisung 100,000 aliba tesem kanga mejungi raksatsü; nisung 400,000 aliba Kalay yimti den tayimtsü ajanga dang tontepratepteter; Chin state nung tajemba agi ki 100 raksatsüogo aser parnok den gari lenmang ajanga tongtepratep mesüteter kechiba süra anentsüh aluba agi lenmang ajak shibanga lir.
Chin, Rakhine aser Magwe state tem nung ano anogo ana tzünglu tesashi arutsü, ta tzü-mopung takzürtemi metetdaktsüogo.
Nisung meyirjang aika Buddhist sentep kidang jenoka lir ajisüaka Rohingya Muslim tembo item jenokdak tesemi marudaktsür.
Burma Times osang ajanga ashiba agi, police-i Rohingya Muslim tem Rakhine nung school aser community hall nungi meindok.
Ministry of Agriculture & Irrigation ajanga ashiba agi, tzülu acre million tesadang ka dak tema tzü agi metsüngbangogo.