Myanmar nung WFP-i food aid agütsüba anena atar

Naypyidaw, September 2 (Agencies): Myanmar kübok Rakhine state nung World Food Programme-i food aid anenogo aser
Rohingya Muslim o Buddhist nungertem tsüngda rara nung nisung meyirjang aika süogo.
WFP dena relief agency temi Rohingya telungpurtem nem ration agütsür ta Myanmar ketdangsertemi aija arur.
August 25, 2017 nü Rohingya telungpurtemi police amakba sülen tang tensa ya ajuru.
2012 küm tamangba yimsü tsütsü mangatettep adokdang nisung meyirjang aika taküm sama aser tensa mejungi aküm. Iba mapang nungi Rohingya Muslim civilian teimba sür nisung 120,000 shi ka aid hand-outs in camps nungidang teyari agia arur.
Tesüiba küm pungu tsüngda Rakhine state nung mepetmesü aser tensa mejungi dang arur saka tang atalokba tensa ya tamajungtiba lir.
“Rakhine State nung security maliba ajanga WFP food assistance maparen ajak anena atar. Iba ya ajanga nisung 250,000 shi ka timtem ajurutsü” ta WFP-i sangdong ka nung metetdaktsü.
“Onoki ketdangsertem den yaritepa timtem ajururtem nem chiyungtsütem agütsütsü merangtsü” ta parnokisa ashi.
Rohingya nunger ya Myanmar nung ozüng alema arurtem ta züngshir aser parnok teimba ka nem senso magütsür.
Tang mepetmesü adokba sülen Rohingya nunger nisung 40,000 shi ka Bangladesh nung jenokogo, ta United Nations-i metetdaktsüogo.
Parnok meyirjang aika Bangladesh border ketdangsertemi nokdang aser ano aikati Naf ayong ajanga Bangladesh-i aotsü meranger.
Hokolbarnü Myanmar nung army tekolakbai ashiba agi, tang mepetmesü adokba nung nisung 400 jungnüa süogo aser parnok rongnung Rohingya telungpur 370 shi lir.
Myanmar lisopurtem rongnung Rakhine Buddhists, Hindu aser tanga telok tilabatem nungi nisung 11,000 shi talidak toktsür aotsüsa kümogo, ta paisa ashi.
Myanmar nung Rohingya telungpurtemji Arakan Rohingya Salvation Army (ARSA) tenüng nung sepaitem anema rarar. ARSA ya yaküm October ita tenzükba lir.