Myanmar nung yimji yimjung lidaktsütsü alizüng ayur: Suu Kyi

National League for Democracy (NLD) telok lenila, Aung San Suu Kyi-i NLD tesepti, Yangon nung agiba 68 buba Myanmar Independence Day anogomong sentong nung o jembia shilem agiba noksa ka yangi angur. (Yangon, January 04)

Yangon, January 04 (Agencies): Myanmar ajunga nung yimji yimjung lidaktsütsü alizüng ayuba osang ka Myanmar lenila, Aung San Suu Kyi-i tanü Hombar nü metetdaktsüogo.
“Myanmar ajunga nung yimji yimjung lidaktsütsüji sorkar tasenba indang mezüng teinyaktsü asütsü,” ta lai sangoktsü.
Suu Kyi-i aniba National League for Democracy (NLD) yimtenren teloki yaküm 2015 küm November ita agiba election nung takok tulu anguba sülen par teloki ita ishika lir Myanmar sorkar tasenba tenteta Myanmar madak yimsü asütsü temeten ngua lir.
Taruba Febuary ita Myanmar Tir election agiba sülen NLD-i aniba sorkar tasenbai taküm March ita nungi tenzüka Myanmar indang yimsüsü tashi benoktsü.
Myanmar sorkar anemertem den yimjung tezüngzüktep agia par linük yimji yimjung tia bener arutsütsü khuret tulu Myanmar sorkari küm 10 tejaklen nungi benoka lir.
Tir Thein Sein-i aniba Myanmar sorkari sorkar anemer telok ishika den yaküm October ita yimjung tezüngzüktep agi saka telok 7 tashi iba yimjung tezüngzüktepji agitsü memulungba yong par linük anüdoklen densemba tesem aika nung sorkar anemertemi sorkar mitkartem den tongpang mapang shia raraba osang bushiteta lir.
“Myanmar sorkar anemer ajunga den yimjung tezüngzüktep agiba ajanga Myanmar ajunga nung yimji yimjung tia bener arutsütsü alizüng yua lir kechiyong yimji yimjung malibo Myanmar-i terenelok mangutsü,” ta Suu Kyi-i ashi.
Myanmar Britain yimli nungi nüchiso ngur küm 68 abensaba bilemtetba Independence Day anogomong sentong nung o jembidang Suu Kyi-i iba olen ya metetdaktsü.
Myanmar sorkar aser sorkar den yimjung tezüngzüktep agir sorkar anemer telok 8 nati tan January ita 12 nü nungi tenzüka maneni yimjung senden amentsü sentong renemba osanga angazükogo.