Myanmar nunger refugee temi kadangi aotsü memulunger

Aizawl, Aenjeti 22 (Agencies): Myanmar nung taoba küm Yimpoksüi (November) nung Arakan telungpur aser Myanmar Army na rara adokba sülen Myanmar nungi refugee parnok 1,400 dak tema Mizoram nung Lawngtlai district kübok jenoka lir, aser parnoki par linüki meyipa aotsü asoshi memulunger, ta police ketdangser kati Tentonü ashi.
Refugee tem shirnok Myanmar nungi jena arua Mizoram nung jenoka lir parnoki ashiba agi, parnok meyipa moner kechiyong parnoki Myanmar Army tsübur, ta police Superintendent Lawngtlai, Lalsanglura-i ashi.
“Myanmar Army aser Arakan telungpur tsüngda rara anenadokogo aser joko ita ka shi prangbong ola mangashir, ajisüaka Mizoram-Myanmar arrtsü nung Laitlang, Dumzautlang, Zochachhuah aser Hmawngbuchhuah yimtsüngtem nung jenoka aliba Myanmar nungeritemi parnok yimtsüngtemi meyipa aotsü asoshi nongnanger,” ta SP-i ashi.
Refugee tem ya timba ka Myanmar Chin state kübok India den arrtsü nung aliba yimtsüng Varang, Paletwa, Pakangwa aser Mulaw nungi lir. Lalsanglura-i ashiba agi inyakyim temelaba akümtsü mechi nung refugee tem ya yimtsüng ana nung refugee camp nung lemdanger jenokdakja lir aser parnok aruba tesem nung yimjung bener aruba sülen kidangi meyipa yoktsü.