Myanmar Parliament-i Kyaw-i benokba sorkar tentettsü onük agizüker

Naypyitaw, March 21 (Agencies): Myanmar Tir tasenba, U Htin Kyaw-i taoba hopta benokba Myanmar sorkar tasenba tentettsü onük Myanmar parliament yimsüsürtemi tanü, Hombar nü agizükogo.

Myanmar sorkar tasenba nung taoba mapang den ministry tajemba alitsü asoshi Kyaw-i tan March ita 17 nü parliament nung benok aser parliament yimsüsür 611 tashi tanü senden nung iba onükji agizükba osang jangjaogo.

Tanü parliament yimsüsürttemi sorkar tasenba tentettsü onük agizüktsü mesüra magizüktsü olemtepba jakdang Kyaw-i sorkar tasenba nung ministry 21 densemtsü aser minister 18 shimtsü asoshi benokba onük parliament yimsüsürtem nem angajemdakja liasü.

Taoba sorkar nung ministry 36 aser minister 32 tashi shima liasü saka Kyaw-i ministry aser minister-tem tajemba shima tan sorkar tasenba tentettsü renema lir.

“Cabinet tasenba nung yimsüsür tajung shimoka ochi ashiba sorkar tasenba tentettsü alizüng yua lir. Sorkar tasenbai linük nung terenlok lidaktsütsü, linük rongsen jenjang tajungba kümdaktsütsü aser kechisarena ajunga nung takok ngua Myanmar linük tejakleni anitsü nükla lir,” ta Kyaw-i Tir tasenba akümtsü maongka anguba sülen tan mezüngsüa yimjak nung o jembia ashi.

Paisa ashiba agi, taoba mapang nungi tan ministry tajemba tentetba ajanga Myanmar sorkar senpong dollar sen million 5 shi agi takarba akümtsü aser iba senji kaketshisatsü bushitsüren, nübur temang jenjang tajungba kümdaktsütsü aser yimdak yimtsüng nung alir taküm tia temaba jenjang nung ajungkettsütsü mapatong balala nung amshitettsü.

Ano külen, Myanmar lisopur taküm jenjang reprangshitsü nükjidong nung Myanmar sorkar nung tan asensa Ethnic ministry-a tentettsü renema lir.

Tan tentettsü renemba sorkar ministry 21 rong nungi defence, home affairs aser border affairs ministry-tembo linük temzüngi melaba ama mitkar lenirtemi ketdang asütsü renemogo.

Kyaw-i maneni sorkar tasenba nung cabinet minister inyaktsü asoshi tenüng benokba yimsüsür tenüng tarensena agizükdaktsütsü asoshi asüng, Mongolbar nü parliament nung benoktsü renemba osang jangjaogo.

Nobel sempet agizüker, Aung San Suu Kyi-i aniba National League for Democracy (NLD) yimtenren telok nungi Tir candidate ka ama shimba sülen Kyaw-i taoba hopta Myanmar Tir tasenba akümtsü maongka ngua liasü.

Kyaw-i aniba sorkar tasenbai tan March 30 nü yimsü asütsü tenangzükba agiba sülen taruba April ita 1 nü nungi tenzüka Myanmar madak yimsü asütsütsü renema lir.