Myanmar: Parliament-i NLD teloki benokba onük agizüker

Naypyitaw, April 01 (Agencies): Myanmar parliament upper house-i National League for Democracy (NLD) yimtenren teloki yashi, Brehostibar nü benokba yimsüsütsü menden tasen tentettsü asoshi benokba onük tanü, Hokolbar nü agizükogo.
Myanmar Tir tasenba, Htin Kyaw-i Myanmar linük madak yimsü asütsüren nung tongti shilem agidaktsütsü nükjidong nung NLD teloki par lenila, Aung San Suu Kyi atema tan asensa yimsüsütsü menden tasen ka, National Presidential Advisor (NPA) menden tentettsütsü onük parliament nung benoka liasü.
Mitkar telok nungi shimba parliament yimsüsürtemi nokdangtsü merang aka, parliament upper house nunga NLD yimsüsür timba aliba yong par NLD teloki takok ngua Suu Kyi atema NPA mendenji tentettsü asoshi tanü onükji agizük.
Suu Kyi-i NPA menden abenba ajanga lai minister-tem aser Tir na tsüngda apu laja tesendaktep tajungba lidaktsütsü shilem agiba den külemi, lai linük temzüng ajangdanga Myanmar madak yimsü asütsü lenmang lapoktsür lir.
Suu Kyi-i yaküm November ita agiba election nung takok tulu ngua liasü saka linük temzüngi memelaba yong lai Tir menden abentsü maongka mongutettsüsa aküm.
Mitkartemi taoba mapang latetba linük temzüng nung bendanger ka den kibong akümer mesüra pei chirnuri bendang senso agia alirtem nem linük Tir menden abentsü temeten magütsütsü lateta lir.
Aji oda, Suu Kyi-i Britain nunger den kibong akümba den külemi, lar jabaso anaprongi Britain senso agia aliba yong lai Tir menden mebentetsüsa jenjang ajuruogo.
“NLD teloki tan benokba onükji agizükra, iba jagi nisung ka nem yimsüsütsü tashi ulura agütsütsü aser kasaji linük temzüng alema inyaker asütsütsü,” ta shia, Colonel Myint Swe densema, mitkar yimsüsürtemi NLD teloki benoka onük anema liasü.
Mitkar yimsüsürtemi nokdangtsü merang aka, parliament lower house aser upper house naprongla nung NLD yimsüsürtem timba aliba yong parnoki temaba jenjang ngua tanü NPA menden tentettsüji onükji agizük.