Myanmar: Rakhine nüburtemi Annan’er mapatong magizüker

Taoba United Nations (UN) Secretary General, Kofi Annan-i aniba teloki Myanmar kübok Rakhine state nung adokba mangatettepbaren bentettsütsü asoshi benokba mapatong magizüker ta Rakhine nung alir nüburtemi Yangon yimtiba nung longkak aitba noksa nung angur. (Yangon, August 27)

Yangon, August 27 (Agencies): Myanmar nung tentetba Rakhine nationalist teloktemi taoba United Nations (UN) Secretary General, Kofi Annan-i aniba yimjung mapatong magizüktsü renemba osang jangjaogo.
Myanmar kübok Rakhine state nung kin o kin na tsüngda adokba mangatetepbaren aser tongpang rarabaren anentsütsü nükjidong nung Annan-i aniba teloki yimjung mapatong tenzüktsü renema lir.
“Rakhine otsü memeteter bendangertemi tenzükba yimjung mapatong magizüktsü lemtetogo kechiyong par mapatong agizükbaji Myanmar nung tentetba kin kidong balala indang temeten aser Myanmar’er peisasa pei madak yimsü asütsü temeten anema inyaker asütsü,” ta Arakan National Party (ANP) telok nung Vice Chairperson, Aye Nu Sein-i metetdaktsü.
Laisa ashiba agi, tesüiba Myanmar Tir, Thein Sein-i Rakhine den sentakba ken o jembitsü aser bushisüngdangtsü sentong agitsü asoshi Rakhine Affairs Investigation Commission tenteta aliba yong kasa ken o jembitsü asoshi tentet mesüra mapatong tasen ka menungdaker.
“UN-i tentetba teloki Rakhine state den sentakba mapatong tenzükra, Rakhine state den sentakba ken o ji Myanmar’er kibok ken o masü saka alimar ken o ka akümtsü,” ta lai shisem.
Rakhine nung alir dak alaka, taoba mapang Myanmar indang yimsüsütsü tashi benoker yimtenren telok, National Democratic Front (NDF) nungi yimsüsürtem aser Myanmar lenila, Aung San Suu Kyi-i aniba National League for Democracy (NLD) yimtenren telok nung züngsemer yimsüsür ishikati Annan-i aniba mapatong magizüktsü renemba osang metetdaktsüogo.
“Rakhine nung alir nübur taküm jenjang tajungba kümdaktsütsü mechi par state adokba mangatettepbaren bentettsü asoshi mapatong ka tenzüktsü renemogo,” ta Kofi Annan Foundation (KAF)-i tan Bodbar nü metetdakja liasü.
Rakhine nung nütsüng yongsük ajema alir Rohinya Muslim nisungtem aser nütsüng yongsük lungsoa alir Buddhist telok na tsüngda 2012 küm nungi tenzüka mangatettep adoka tongpang raratsü tenzükba sülen tanü tashi nung nisung 100 dak tema asüba aser pei talidak melitettsüa akümer nisung 100,00 dak temai jenokdak balala nung jenoka aliba osang bushitetogo.