Myanmar refugee tem pei yimtsüngi aotsü nongnanger

Aizawal, Monupii (May) 21 (Agencies): Myanmar army aser Arakan Army (AA), na asenteshir rara tenzüba ajanga Myanmar nunger refugee parnok 300 dak tema parnok yimtsüngi meyiba aotsü asoshi nongnanger, ta osang ka ajanga metetdaktsü.
Police sangdong ka ajanga ashiba agi, Myanmar Army aser Arakan Army na tsüngda rara adokba sülen Buddhist aser Khristan refugee parnok 1,750 shi Myanmar kübok Arakan (Rakhine) state nung parnok yimtsüng toktsür international arrtsü ajanga Mizoram kübok Lawngtlai district-i taoba küm Yimpoksüi (Nov) nung jena aru.
Mizoram kübok refugee parnok 300 dak tema tang tashi lidar aser parnok pei yimtsüngi aotsü nongnanger, kechiyong Myanmar Army aser telungpur na tsüngda asentenshir rara tenzükogo.
Arakan Army ya Myanmar kübok Rakhine telungpur telok ka lir aser parnok Kachin Independence Army den longjemer Myanmar Army den rarar. Parnoki Arakan nunger temeden aser tejangrabatem kümzüka ayutsü atema raraa arudar.
Tsüklai (Feb) nungi Rongchii (April) tashi kecha lendong madoki arur Monupii (May) 9 aser 12 nü Myanmar Army aser Arakan Army tsüngda khatepa liasü, ta police-i metetdaktsü. Parnoki ashiba agi, refugee tem ya Mizoram nung dang alitsüba mulungteter lir.
Mizoram-i aruba Refugee tem ya timba ka Rakhine state kübok Zhakai kin nungi Buddhists aser Khristan tamangba yimsü dak amangertem lir. Rakhine nung taoba küm Luroi (Aug) nungi tenzüka azütokshia raraa arudar aser Rohingya Muslim nunger aika iba tesem toktsür jenaogo. Iba mangatettep ya Myanmar kübok Paletwa tesem nung Kaladan ayong anasa Arakan Army temi Myanmar Army 11 khasetba sülen tenzük.
Police temi ashiba agi, refugee tem ya parnok yimtsüngtem nung landmine rema aliba tsübuba agi moner. Assam Rifles sepaitemi Mizoram nung taoba küm Yimpoksü (Nov) nungi tang tashi nung landmine 31 defuse sütsüogo.
Mizoram ya Myanmar aser Bangladesh den arrtsü km 722 lemsateper.