Myanmar Rohingya nungertemi international peacekeepers yoktsü mepir

Yangon, March 29 (Agencies) : Rohingya telungpur telok kati Bodbarnü Myanmar nung Muslim nunger kümzüka ayutsü atema international peacekeepers teyari meshiogo.
Yaküm October ita Arakan Rohingya Salvation Army (ASRA) ta ajaba Rohingya telungpur teloki Rakhine State nung police border post tem amak. Ajisüaka, iba sülen sepaitemi parnok anema mapa inyaktsü tenzükba ajanga Rohingya nunger meyirjang aika Bangladesh nung oa jenoktsüsa tensa ajuru.
“Arakan (Rakhine) nung Rohingya nunge kümzüktsü atema parnoki iba mapa inyak” ta ASRA-i metetdakja liasü.
“Onok kümzüka ayutsü atema mapa inyaktsübaji ‘international law’ kübok onok nem temeten agütsür” ta parnokisa ashi.
Tanü parnoki Rohingya nunger kümzüka ayutsü atema Arakan State-i international peacekeeping force yoktsü atema temepishi agütsüogo.
Iba shidi nung “commander-in-chief” Ata Ullah-i sign süa lir aser pa ya Rohingya nunger nem temeten agüjang ta shia yangluba video aika nung adoka lir.
Myanmar sorkari Arakan Rohingya Salvation Army (ASRA) ji kiralongrar telok ka ta züngshir. Parnok nem Middle East ajanga senotsü teyari agütsür aser Taliban-i training agütsür ta sorkari tai tongloktsür.
Ajisüaka, International Crisis Group ajanga ashiba agibo, 2012 küm Rakhine nung kin o kin anema raratep adokba sülen iba telok ya tentet.
Rakhine nung mepetmesü adokba ajanga Rohingya nunger meyirjang aika displacement camp tem nung alitsüsa tensa ajuru.
Myanmar sepaitemi Rohingya nunger noklang aika tepseter südi ta UN investigators-i temulung melemi bilemer. Taoba hopta tu UN Human Rights Council-i osang tejangja metettsü atema bushisüngdanger telok ka Myanmar-i yoktsü mulunga agizükogo.
Ajisüaka, Myanmar nung Aung San Suu Kyi-i aniba civilian government-i tai tongloktsüba onüktem magizüker aser bushisüngdang asüba ajanga mangatettep tuluba akümtsü ta ashir.