Myanmar sepaitemi tenük yokba nung Khristanpur dena lir

Naypyitaw, Aami/June 03 (Agencies): Osang tasen ka sangdongba nung nisung meimchir temeden mitba lokti tentet, Amnesty International ajanga Myanmar sorkari raraba mapang mapa tamajung inyak ta tai tongloktsü aser linük balala dang telangzüba agütsüstü ajungshi.
Amnesty ajanga ashiba agi, Myanmar kübok Rakhine state nung mitkartemi January 2019 nungi tenzüka taochi melie amakba mapang civilian aika taküm samatsü aser yirutsü aser ozüngi melaba dak alia temerenshi agütsü, pei mulungba nung nisung apu, reshikangshia amshi. Osang ajanga angazükba agi, sepaitemi item mapa ya sorkari totyuyba agütsüba nung ajemdaker inyak, kong ethnic Rakhine telungpur, Arakan Army (AA) ajunga samatsütsü ozüng agüja lir.
Amnesty ajanga ethnic kintem den survey agiba mapang Khristanpuri timtem ajangshia aliba ngutet.
Parnoki ashiba agi, Amnesty International ajanga sensaksem 81 kaogo, aser item rongnung March 2019 tatemlen Rakhine State nung 54 ben aser tesem tezülen 27 ben rara agi timtem balala agüja alirtem den sensaksem aka. Parnok rongnung Buddhist, Khristan aser Muslim yimsü amanger ethnic Rakhine, Mro, Rohingya aser Khami yimdaklirtem lir.
Open Doors USA indang tir aser CEO David Curry-i ashiba agi, mitkartem aser ethnic kin telungpur tsüngta raraba ya Myanmar nung manener. “Taoba küm ishika tsüngta Myanmar sorkari kin tilatem mesüra par tashi anema nokdaker den tashi ajak amshia rara arur,” ta pai ashi.
Kin ajunga iba lendong nung densema lir. Mapang kakabo tamangertem daka tenük yoker.
Taoba küm pezü tsüngta Myanmar ya Open Doors ajanga alima nung Khristanpur alitsü asoshi linük tamajungtiba 50 asadangba nung jenjang 25buba nungi 18bubai atuogo. Yamaji Tsüngrem mapa inyakertemia Khristanpuri timtem ajangshiba indang ashir.
Kachin aser northern Shan State ama Khristanour timba aliba tesemtem nung maneni raraba ya odangbo yutsüla masü… Khristanpur tepseter, pua ayur aser refugee camp tem nung tangar kin meyirijang aika den külemi alitsüsa aridoker. Item tesemtem nung ola osang agiteptsü tasak, anungji tensa aika memeteter, ta ashir.
Parnokisa ashiba agi, tamangertem reshikangshi ya talisa mitkartemi agütsür.
“Myanmar sorkari shir telokisa par anema nokdaktsü amai bilemer mesüra lokti asoshi timtem amai ajiteter, parnok anema nokdakner, aser parnoki reshikangshir rongnung Khristanpur telok tuluka lir,” ta Curry-i ashi.
“Myanmar nungi Khristanpur 100,000 parnok kidang nungi arudokogo. Parnok ya camp tem nung alir aser parnoki Khrista dak amangba mechi chiyongtsü aser health care monguteter. Myanmar nung parnok kanga reshikangshir aser iba atema shingaia mejembir,” ta paisa ashi.
Myanmar nung timtem ajangshia aliba tamangertem asoshi sarasademjang, ta pai ashi.
“Parnok Yisu sülen anidakba ajanga mapa nungi indoker. Parnok taküm kümzüka alitsü asoshi sarasademjang,” ta Curry-isa ashi.