Myanmar sorkar anemertemi arisanga sorkar den yimjung tezüngzüktep magitsü ajungshir: Suu Kyi

Yangon, August 26 (Agencies): Tongpang nung amshitsü osettsüset bener Myanmar sorkar anema raraba sorkar anemertemi kanga junga mebilemdangi arisanga sorkar den yimjung nung alitsü tezüngzüktep magitsü tajungshiba olen ka Myanmar opposition lenila, Aung San Suu Kyi-i tanü Bodbar nü metetdaktsüogo.

Suu Kyi-i tanü iba olenji metetdaktsüba ajanga lar alizüng aser Myanmar Tir, Thein Sein indang alizüng khen yongi balala aliba kuli tejangja sayur kechiyong taküm November ita agitsü ayongba general election agiba jakdang sorkar anemer ajunga den yimjung tezüngzüktep agitsü alizüng Tir Sein-i yua lir.

Ita 18 tejaklen nungi tenzüka Tir Sein-i aniba Myanmar sorkar aser sorkar anemer telok 10 dak temai mapang mapang nung ajurutepa yimjung nung alitsü senden balala amenba osang bushiteta lir.

Myanmar nung tentetba opposition yimtenren telok, National League for Demcracy (NLD) lenila, Suu Kyi-i sorkar anemba tongti telok, Karen National Union (KNU) lenisang, Maj. Htoo Htoo Lay den ajurutepdang sorkar den arisanga yimjung nung alitsü tezüngzüktep magitsü tajungshiba olenji lemsatep ta NLD nung executive züngsem, Win Htein-i tanü osang jangjashitsü.

Pei aliba tesemtem nung peisasa yimsü asütsü temeten tuluba agütsüdaktsütsü takhangba benoka Myanmar nübur kin balalai küm 10 shi tejaklen nungi tenzüka Myanmar sorkar anema tongpang raraba osanga bushiteta lir.