Myanmar sorkari ’emergency law’ agiener

Naypyidaw, October 5 (TYO) : Taoba mapang mitkar lennirtemi parnok den toktepertem azüokba ozüng tesashi ka Myanmar sorkari agienogo.
Britain nungi nüjiso anguba sülen 1950 nung Emergency Provisions Act yanglu. Iba ozüng ajanga ozüng amertemi kuli kecha meliaka nisungtem aputsü, tepuokdak ayutsü mesüra tepsettsü tashi agüja liasü.
Public menentsüba mesüra osang tiyazü belenshiba ken o tem nung aitsürtem iba ozüng ajanga küm 7 tashi tepuokdak ayutsü temerenshi agütsü.
Taküm küm tetenzüklen Myanmar nung National League for Democracy (NLD)-i sorkar tentetba sülen iba ozüng agientsü atema mapa inyaka aru.
“Iba ozüng ya nisung kijai sorkar yimsü asürtemi amshi aser parnok anema noktakertem iba ozüng kübok merenshi” Myanmar Parliament nung bill committee chairman, Tun Tun Hein-i ashi.
“Onoki iba ozüng agiener kechiyong tangbo nübortem indang sorkar lir” ta paisa shisem.
Ajisüaka, mitkar tanishir kari iba inyakyim anenma noktaker aser national security atema ozüngji tongtipang ta ashir. Myanmar Parliament nung menden 25% ji mitkartem asoshi lemzükja lir.